ඇමෙරිකානු කොංග්‍රසයේ කටයුතුවලට බාධා කරමින් සිටි කලහකාරී ට්‍රම්ප් හිතවාදීන් එළවා දැමීමෙන් පසු, ඇමෙරිකාවේ ජනාධිපතිවරණයේ ප්‍රතිඵලය පිළිගනිමින් ජෝ බයිඩන්ගේ ජය තහවුරු කරන තීන්දුව සුළු මොහොතකට පෙර ඇමෙරිකානු කොංග්‍රසය ගෙන ඇත.
එහිදී ට්‍රම්ප්ගේ සමීපතමයන් වූ උප ජනාධිපති මයික් පෙන්ස් සහ මිච් මැක්කොනල් පළමු වරට ට්‍රම්ප්ට එරෙහිව යමින් ජෝ බයිඩන්ගේ ජය පිළිගැනීම විශේෂත්වයක් විය. ඒ දෙදෙනාම ට්‍රම්ප්ගේ කිමන් පිළිගත් දෙදෙනෙක් විය.
තමන්ට ආණ්ඩුක්‍රම ව්‍යවස්ථාවට පිටින් කටයුතු කරන්නට බැරි බව මයික් පෙන්ස් කියා ඇත.
සියලු උත්සාහයන් අසාර්ථක වූ පසු, මෙම කලහකාරී හැසිරීම් නිසා මිනිස් මරණ හතරක්ද සිදු වූ පසු, තමා ජනවාරි 20 දා ධුරයෙන් බැස යෑමට සූදානම් බව ඩොනල්ඩ් ට්‍රම්ප් කියා ඇත.
ඒ අනුව ජනවාරි 20 වැනිදා ජෝ බයිඩන් ජනාධිපති ධුරයේ දිවුරුම් දීම ප්‍රතික්ෂේප කිරීම සඳහා කිසිදු හේතුවක් නොමැත. කුපිත කරවන ලද කලහකාරී පිරිසක් කොංග්‍රස් ගොඩනැගිල්ලට ඇතුළු වීම සඳහා පොළඹවමින් ජනාධිපතිවරණ ප්‍රතිඵලය විකෘති කිරීමට ට්‍රම්ප් ගත් අවසන් උත්සාහයද ඒ අනුව ව්‍යර්ථ විය.
ජනවාරි 06 වැනිදා ඇමෙරිකාවේ කොංග්‍රසය මැතිවරණ ප්‍රතිඵලය නිල වශයෙන් පිළිගැනීමට නියමිතව තිබුණි. සාමාන්‍ය තත්වය අනුව එදිනට විශේෂ තීන්දුවක් නැත. සිදුවීමට නියමිත වුණේ සම්ප්‍රදාය අනුව ප්ති‍රඵල පිළිගැනීම පමණි. ජනතා ඡන්දයෙන් තේරී පත් වූ අපේක්ෂකය ප්ති‍රක්ෂේප කිරීමක් කිසිදා කරන්නේ නැත. එහෙත් පළමු වරට, ජෝ බයිඩන්ගේ ජයග්‍රහණය ප්‍රතික්ෂේප කරමින් තීන්දුවක් ගන්නා ලෙස ට්‍රම්ප් ඉල්ලා ඇත. කලහකාරී පිරිස් කඩාවැදුණේ එම ඉල්ලීම වෙනුවෙනි.
කෙසේ වෙතත් අනෙක් රටවල්වල ප්‍රජාතන්ත්‍රවැාදය ගැන කතා කළ ඇමෙරිකාවට, මෙම සිදුවීමෙන් ඇති වූ අවමානය අතිශය දැවැන්ත බව විචාරකයන් හා දේශපාලන නායකයන් පෙන්වා ඇත.
