තමන්ට ද කොවිඩ් 19 ආසාදනය වීමේ වැඩි ඉඩක් ඇති බැවින් ඉක්මනින් පීසීආර් පරීක්ෂණ සිදුකරන ලෙසත් එසේ නොමැති නම් වෙනත් බන්ධනාගාරයකට මාරු කරන ලෙසත් පවසමින් පැරණි බෝගම්බර බන්ධනාගාරයේ රැඳවියන් පිරිසක් වහලය මත නැගී විරෝධතාවයක් ආරම්භ කර ඇත
බන්ධනාගාර රැඳවියන් නිරෝධායනය කිරීම සඳහා එම බන්ධනාගාරය යොදා ගන්නා අතර එහි රැඳවියන් 800කට ආසන්න ප්‍රමාණයක් නිරෝධායනය සඳහා යොමුකර ඇත. එම රැඳවියන් අතරින් රැඳවියන් 30 ක්ට හා නිලධාරීන් දෙදෙනෙකුට කොවිඩ් 19 වෛරසය ආසාදනය වී ඇත.
කෙසේවෙතත් අදාල විරෝධතාව සම්බන්ධයෙන් මාධ්‍ය කළ විමසීමකදී බන්ධනාගාර කොමසාරිස් ජෙනරාල් තුෂාර උපුල්දෙණිය පවසා ඇත්තේ බෝගම්බර බන්ධනාගාරයේ 350 ක පමණ පිරිසකගේ පී.සී.ආර් පරීක්ෂණ සිදුකර අවසන් බවත් නොවැම්බර් 12 වන දින තවත් රැඳවියන් 100 කගේ පමණ පී.සී.ආර් පරීක්ෂණ සිදුකිරීමට මහජන සෞඛ්‍ය පරීක්ෂකවරුන් කටයුතු කරන බවත්ය.
