කොළඹ මහනගර සභා සීමාවේ වරාය ආශ්‍රිතව පාලනයකින් තොරව කොවිඩ්-19 ආසාදිතයන් පැතිර යන බවත්, වරාය ආශ්‍රිතව අනුගමනය කරන ක්‍රමවේදය පිළිබඳ බරපතල ගැටලුවක් පවතින බවත් මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ පවසා ඇත.
ඔහු කියා තිබුණේ මෙසේය.
“දැනට සංචරණ සීමා පනවා ඇති ප්‍රදේශවල රාජ්‍ය හා පෞද්ගලික ආයතන විවෘත කිරීමට අවසර ලබා දීම නිසා, ඇතැම් ආයතනවල මේ වෙද්දි ආසාදිතයින් වාර්තා වෙනවා හා එම විවෘත කරපු ආයතන නිසා යම් අවදානම් තත්ත්වයකට මේ ප්‍රදේශ පැමිණෙමින් තියෙනවා කියලා පැහැදිලිව පේන්න තියෙනවා. විශේෂයෙන් කොළඹ මහනගර සභා සීමාවේ වරාය ආශ්‍රිතව තවදුරටත් පාලනයකින් තොරව ආසාදිතයින් පැතිර යමින් තියෙනවා. ඒ වගේම වරාය ආශ්‍රිතව අනුගමනය කරන ක්‍රමවේදය පිළිබඳවත් බරපතළ ගැටළු නිර්මාණය වෙලා තියෙනවා. ඒ වගේම රාජ්‍ය හා පෞද්ගලික ආයතන සංචරණ සීමා පනවපු ස්ථානවල විවෘතව තබා ගැනීමේ දී ඒ ස්ථානවල සෞඛ්‍ය ක්‍රමානුකූල ක්‍රමවේදයන් ක්‍රියාත්මක කරනවා ද කියන එක සම්බන්ධව දැඩි අවධානයක් යොමුකළ යුතුව තියෙනවා.“
