දකුණු අප්‍රිකානු කලාපයක පුරාවිද්‍යාත්මක කැණීම් සිදුකරමින් සිටියදී තම කණ්ඩායම වසර මිලියන 2ක් පැරණි හිස් කබලක් සොයාගත් බව ඔස්ට්‍රේලියානු විද්‍යාඥයින් පිරිසක් පවසයි.
මෙල්බර්න් “ලා ත්‍රොබ්” විශ්වවිද්‍යාලයේ ගවේෂකයින් පිරිසක් එම හිස් කබල සොයාගෙන ඇත්තේ ඩ්‍රයිමොලන් පුරාවිද්‍යාත්මක කැණීම් භූමියෙනි. එය ජොහැන්නස්බර්ග් නගරයට උතුරින් පිහිටයි.
මෙම සොයා ගැනීමත් සමඟ මානව වර්ගයාගේ පරිණාමය පිළිබඳව වැදගත් තොරතුරු රැසක් හෙළිවෙතැයි ඔවුන් පවසයි.
මෙම සොයාගැනීම ඉතා සුවිශේෂී සොයා ගැනීමක් බව ගවේෂණ කණ්ඩායම විදෙස් මාධ්‍ය වෙත පවසා තිබුණි. මෙම හිස්කබල හමුවූ ස්ථානයට ආසන්නයේ තිබී 2015 දී “හෝමෝ ඉරෙක්ටස්” මානව දරුවෙකුගේ හිස් කබලක් ද සොයාගැණුනු අතර එම හිස්කබල ද වසර මිලියන 2ක් පමණ පැරණි බව සොයාගෙන තිබුණි.
එම හිස්කබල පිරිමි “පැරැන්ත්‍රෝපස් රොබස්ටා” මානවයෙකුගේ බව සඳහන් වේ. මෙම මානවයා නුතන මානවයාගේ ආසන්නතම මුතුන් මිත්තන් ලෙස සැලකෙන “හෝමෝ ඉරෙක්ටස්” ගේ ඥාතියෙකි. එම මානව විශේෂ දෙක එකම කාලයක ජීවත් වී ඇති අතර නමුත් “පැරැන්ත්‍රෝපස් රොබස්ටා” නම් මානව විශේෂය පළමුව වඳ වී ගොස් ඇති බව වාර්තා වේ.
