සේවක හිඟය හේතුවෙන් අද (02) උදෑසන ධාවනය වීමට නියමිතව තිබූ කාර්යාල දුම්රිය 10ක් අවලංගු කර තිබෙනවා.
කැළණිවැලි මාර්ගය, මුහුදුබඩ, පුත්තලම් සහ ප්‍රධාන මාර්ගවල දුම්රිය මෙලෙස අවලංගු වී ඇති බවයි ශ්‍රී ලංකා දුම්රිය ස්ථානාධිපති සංගමයේ සභාපති සුමේධ සෝමරත්න මහතා කියා සිටියේ.
මේ අතර දුම්රිය ධාවනය සඳහා ප්‍රමාණවත් සේවකයන් නොමැති හේතුවෙන් දුම්රිය ගමන් වාර 30කට අධික සංඛ්‍යාවක් අවලංගු කර ඇති බව දුම්රිය නියෝජ්‍ය සාමාන්‍යාධිකාරී ගාමිණි සෙනෙවිරත්න මහතා පවසනවා.
ඒ මහතා පෙන්වා දෙන්නේ දුම්රිය නියාමකයන් සහ දුම්රිය සාහයකයන් ඇතුළු හිඟය මෙම තත්ත්වයට ප්‍රධාන හේතුව වී ඇති බවයි.
පවතින තත්ත්වය මත සේවකයන් කළමනාකරණය කරමින් දුම්රිය ධාවනය පවත්වාගෙන යෑමට සිදුව ඇති බව නියෝජ්‍ය සාමාන්‍යාධිකාරී සඳහන් කරනවා.
