ලංකා විදුලිබල මණ්ඩලයේ අතිරේක සාමාන්‍යාධිකාරී තනතුරේ වැඩ ආවරණය කිරීම සඳහා ඉංජිනේරු ඩබ්ලිව්. ජයරත්න මහතා පත් කිරීමට ගනු ලැබූ තීරණය ක්‍රියාත්මකවීම වළක්වාලමින් අභියාචනාධිකරණය විසින් ඊයේ (23) අතුරු තහනම් නියෝගයක් නිකුත් කර තිබෙනවා.
පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ ෆයිසර් මුස්තාපා මහතා ඉදිරිපත් කළ කරුණු සලකාබැලූ අධිකරණය විසින් මෙම නියෝගය නිකුත් කළ අතර මෙම පෙත්සම් විභාගය අවසන් වන තෙක් අතිරේක සාමාන්‍යාධිකාරි ධුරයට වෙනත් අයකු පත් කිරීම වළක්වාලමින් තවත් අතුරු තහනම් නියෝගයක්ද නිකුත් කෙරුණා.
අතිරේක සාමාන්‍යාධිකාරී ධුරය සඳහා පත්වීම් සිදු කිරීමේදී ජ්‍යේෂ්ඨත්වය නොසලකා කටයුතු කිරීමට එරෙහිව ඉංජීනේරු ටී.ඒ. වන්නිආරච්චි මහතා ඇතුළු පිරිසක් ගොනුකර තිබූ පෙත්සමක් විභාග කිරීමට අවසර දෙමින් අභියාචනාධිකරණ විනිසුරු ලෆාර් තාහීර් මහතා විසින් මෙම අතුරු තහනම් නියෝගය නිකුත් කර තිබෙනවා.
