රාජ්‍ය විවිධ නීතිගත සංස්ථාව විසින් නැනෝ AV 99 මුව ආවරණ ලබාගැනීමේදී ‘ප්‍රඥා බන්දු ශිෂ්‍යත්ව අරමුදල’ එක් මුව ආවරණයකින් රුපියල් 2 ක් ලබාගෙන ඇති බව පවසමින් ඊට අදාළ නීතිමය කටයුතු සිදුකරන ලෙස ඉල්ලා පාරිභෝගික අයිතීන් සුරැකීමේ සංවිධානය ඊයේ (13) අල්ලස් කොමිසමට පැමිණිල්ලක් ඉදිරිපත් කළා.
සතොස හරහා මෙම මුව ආවරණ අලෙවි කර ඇති බවත් රුපියල් දෙකක මුදලක් ශිෂ්‍යත්ව අරමුදලට ලබාදීම නිසාවෙන් ජනතාවට නියමිත මිලට වඩා වැඩි මිලකට මෙම භාණ්ඩය මිලදී ගෙන ඇති බවත් එම සංගමයේ සභාපති රංජිත් විතානගේ මහතා පවසනවා.
ඔහු පවසන්නේ මේ නිසා දැනට ශිෂ්‍යත්ව අරමුදලට අයකරගෙන තිබෙන මුදල් රජයේ අරමුදලකට ලබාගෙන එම අරමුදල හරහා ජනතාවට සහනයක් ලබාදීමට කටයුතු කරන ලෙසට බලධාරීන්ගෙන් ඉල්ලා සිටින බවයි.
මේ ආකාරයෙන් භාණ්ඩ මිලදී ගැනීමේදී අරමුදලකට මුදල් ලබාගැනීම නරක ආදර්ශයක් බැවින් මේ සම්බන්ධයෙන් කඩිනමින් නීතිය ක්‍රියාත්මක කල යුතු බව රංජිත් විතානගේ මහතා වැඩිදුරටත් සදහන් කරනවා.
