ගාල්ල තැපැල් කාර්යාලය ඉදිරිපිට සමුද්‍ර මාවතේ පිහිටි පදික වෙළඳසල් 34ක් ගාල්ල අතිරේක මහේස්ත්‍රාත් අධිකරණයේ නියෝග පරිදි අද (27) කඩා ඉවත් කිරිමට පියවර ගත්තා.
අතිරේක මහේස්ත්‍රාත්වරිය පසුගිය වසරේ (2023) මාර්තු 16 වැනිදින වෙළඳසල් හිමියන්ට ඉවත්විමේ නියෝගය නිකුත්කර එම දේපලෙහි භුක්තිය කඩවත් සතර ප්‍රාදේශිය ලේකම්වරයාට බාර දෙන ලෙස නියෝග කර තිබෙනවා.
එහෙත් වෙළඳසල් හිමියන් ඉවත් නොවි සිටිම නිසා අධිකරණයේ රෙජිස්ටාර්වරිය සහ නියෝජ්‍ය පිස්කල්වරිය පැමිණ මෙසේ කඩා ඉවත් කිරිමට පියවර ගෙන තිබුණා.
වෙළඳසල් හිමියන් බොහෝ දෙනෙකු ඊයේ (26) රාත්‍රියේ සියලුම භාණ්ඩ ඉවත්කර ගෙන තිබු අතර සමහර වෙළඳසල් හිමියන් අද උදැසනද භාණ්ඩ ඉවත් කර ගත්තා.
භාණ්ඩ ඉවත්කර ගෙන ඉබි යතුරු දමා තිබු වෙළඳසල් වල ඉබි යතුරු නගර සභාවේ සේවකයින් විසින් කඩා ඉවත් කිරිමට පියවර ගෙන තිබුණා.
මෙම අවස්ථාවට විශේෂ පොලිස් ආරක්ෂාවක්ද යොදවා තිබු බවයි වාර්තා වන්නේ.
