මෙරට ක්‍රීඩා ඉතිහාසයේ පළමු වරට පැරාලිම්පික් රන් පදක්කමක් දිනාගත් දිනේෂ් ප්‍රියන්ත හේරත් හට කෝටි 5ක (ලක්ෂ 500ක) ත්‍යාග මුදලක් ලබාදීමට ක්‍රීඩා අමාත්‍යාංශය තීරණය කර තිබේ.
ටෝකියෝ පැරාලිම්පික් තරගාවලියේ හෙල්ල විසිකිරීමේ ඉසව්වෙන් ලෝක වාර්තාවක් තබමින් රන් පදක්කම හිමිකරගත් 35 හැවිරිදි දිනේෂ් ප්‍රියන්ත හේරත් අනුරාධපුරයේ පදිංචිකරුවෙකු වනවා.
සැරයන් දිනේෂ් ප්‍රියන්ත බලලත් නිලධාරී 01 දක්වා උසස් කළ බව පසුගියදා යුදහමුදාපතිවරයා විසින් නිවේදනය කර සිටියා.
ඔලිම්පික් හා පැරාලිම්පික් ඉතිහාසයේ ශ්‍රී ලංකාව රන් පදක්කම් හිමිකරගත් පළමු අවස්ථාව මෙය වන අතර මේ හේතුවෙන් දිනේෂ්ගේ පුහුණුකරු වන ප්‍රදීප් නිශාන්ත මහතාටද රුපියල් ලක්ෂ 165ක් පිරිනැමීමට නියමිතය.
ඊට අමතරව හෙල්ල විසිකිරීමේ ඉසව්වකින් තවත් ලෝකඩ පදක්කමක් හිමිකරගත් දුලාන් කොඩිතුවක්කු වෙතද රුපියල් කෝටි 2ක මුදලක් පිරිනැමීමට තීරණය කර තිබේ.
