වහාම ක්‍රියාත්මක වන පරිදි ඉන්දියාවේ සෑම දිස්ත්‍රික්කයකම ඔක්සිජන් නිෂ්පාදනාගාරයක් ඉදිකිරීමට පියවර ගෙන තිබේ.
ඒ මේ වනවිට එරට තුළ පවතින දැඩි ඔක්සිජන් හිගයට පිළියමක් වශයෙනි.
රාජ්‍ය, පෞද්ගලික සහ ආරක්ෂක අංශවල සහයෙන් කඩිනමින් මේවා ඉදිකිරීමට නියමිතයි.
මේ යටතේ සෑම දිස්ත්‍රික්කයකම ප්‍රධාන රජයේ රෝහලක් ආශ්‍රිතව ඔක්සිජන් නිෂ්පාදනාගාරය බැගින් ඒවා 551 ඉදිකෙරෙන අතර ඒ සදහා යොදාගැනෙන්නේ අගමැති නරේන්ද්‍ර මෝදි යටතේ ඇති කෝවිඩ් අරමුදලයි.
මේ අතර ජර්මනියෙන් ජංගම ඔක්සිජන් නිෂ්පාදනාගාර 25ක් පමණ ආනයනය කිරීමටද ඉන්දියාව පියවර ගෙන තිබේ.
ඉන්දීය ගුවන් හමුදාවේ භාණ්ඩ ප්‍රවාහන යානා ඒ සදහා දැනටමත් යවා ඇතැයි වාර්තා වේ.
මේ අතර ඇමරිකාව සහ බ්‍රිතාන්‍යය විසින් එවනු ලැබූ ඔක්සිජන් ඇතුළ තවත් අත්‍යවශ්‍ය වෛද්‍ය උපකරණ රැසක් අද දිනයේදී ඉන්දියාව වෙත ළඟාවී තිබේ.
එමෙන්ම අද ඉන්දීයාව විසින් පසුගිය දෙවසර තුළ විශ්‍රාම ගිය හමුදාවට සම්බන්ධ වෛද්‍යවරුන් යළි සේවයට කැදවා තිබිණ.
ඉදිරි දිනවලදී ඉන්දියාවේ කොවිඩ් තත්වය තවදුරටත් ඉහළ යනු ඇතැයි විශ්වාස කෙරෙන අතර මේ වනවිට එහි දෛනික ආසාදිතයන් සංඛ්‍යාව තුන්ලක්ෂ පනස්දහස ඉක්මවන අතර මරණ සංඛ්‍යාව දෙදහස් පන්සියය ඉක්මවයි.
තත්ත්වය පාලනය කිරීම සදහා දිල්ලිය සහ කර්ණාටක ප්‍රාන්තය වසාදමා ඇති අතර තවත් ප්‍රාන්ත රැසක විවිධ සීමා පනවා තිබේ.
