කුරුවිට ප්‍රදේශයේ පදිංචිව සිටි පුද්ගලයෙක් 2002 වසරේදී ඝාතනය කර තිබූ අතර ඊට සැකකෙරුණේ ඔහුගේ බිරිඳගේ සහෝදරයායි.
එවක 22 හැවිරිදි වියේ පසුවූ සැකකරු ඝාතන සිද්ධියෙන් මාස 3කට පසු පොලිස් අත්අඩංගුවට පත්වී පසුව ඇප මත මුදා හැර තිබුණා.
ඒ අතරවාරයේ ඔහු රටින් පළාගොස් විදේශගතවී තිබු අතර, සැකකරු දිගින් දිගටම නඩුවට ඉදිරිපත් නොවීම නිසා සැකකරු නොමැතිව පැමිණිල්ලේ සාක්ෂි මත පමණක් පදනම් කරගෙන ක්‍රියාත්මක වූ නීති කෘත්‍යයේදී රත්නපුර මහාධිකරණය 2019දී තීන්දු කළේ, සැකකරුට මරණ දඬුවම නියම කිරීමටයි.
කෙසේවෙතත්, විදේශ රටවල සංචාරය කළ සැකකරු මේ වසරේ ජනවාරි මස යළි දිවයිනට පැමිණ බෝපත් ඇල්ල – අගලවත්ත ප්‍රදේශයේ අත්හැර දැමූ නිවසක රහසිගතව ජීවත්වී ඇති බවයි වාර්තා වන්නේ.
සැඟව සිටින මෙම සැකකරු සම්බන්ධයෙන් කුරුවිට පොලිසියේ අපරාධ අංශයේ ස්ථානාධිපති ප්‍රධාන පොලිස් පරීක්ෂක ජී. උදයශාන්ත මහතාට තොරතුරක් ලැබී ඇත්තේ ඒ අතරවාරයේදීයි.
වහා ක්‍රියාත්මක වූ පොලීසිය ඊයේ (23) රාත්‍රියේ අදාළ සැකකරු අත්අඩංගුවට ගෙන තිබුණා.
ඒ අනුව, තම අක්කාගේ ස්වාමි පුරුෂයා ඝාතනය කිරීමේ සැකකරු අත්අඩංගුවට ගෙන තිබුණේ, වසර 22කට පසුවයි.
සැකකරු අධිකරණයට ඉදිරිපත් කිරීමෙන් පසු එළැඹෙන සඳුදා දක්වා රක්ෂිත බන්ධනාගාරගත කරනු ලැබුවා.
