ජර්මානු නෞකාවක් වන සෝන් සඳහා ශ්රී ලංකාවට අයත් සුවිශේෂී ආර්ථික කලාපයේ පර්යේෂණ කටයුතු කිරීම තහනම් කර තිබෙනවා.
විදේශීය නැව් සම්බන්ධ එවැනි ක්රියාකාරකම් සඳහා ශ්රී ලංකාව ක්රියාත්මක කර තිබෙන වසරක තහනමට අනුකූලව එම නෞකාව සඳහා මෙම පර්යේෂණ කටයුතු තහනම් කර ඇති නමුත් එම නෞකාවට කොළඹ වරායට පැමිණ නැවත පිරවීම් කටයුතු සඳහා අවසර දෙනු ඇති බවට වාර්තා වනවා.
චීන පර්යේෂණ යාත්රා තම අසල්වැසි මුහුදු ප්රදේශයේ නැව්ගත කිරීම සම්බන්ධයෙන් ඉන්දියාව මතුකළ කණස්සල්ලත් සමග විදේශීය පර්යේෂණ නැව් සිය මුහුදට ඇතුළුවීම වසරක කාලයක් සඳහා අත්හිටුවන බව රජය විසින් ප්රකාශයට පත් කර තිබෙනවා.
එය ප්රකාශයට පත්වන්නේ චීනය තවත් පර්යේෂණ යාත්රාවක් යෙදවීමට ඉල්ලා සිටීමත් සමඟයි.
ශ්රී ලංකා රජයේ තීරණය ඉන්දියාවට ප්රතිචාරයක් ලෙස සැළකෙන බව සඳහන්.
චීන පර්යේෂණ නෞකාවක් වන Shi Yan 6 පසුගිය ඔක්තෝබර් මාසයේදී දින කිහිපයක් කොළඹ වරායේ රැඳී සිටි අතර 2022 දී යුආන් වැන්ග් 5 නාවික යාත්රාව හම්බන්තොට වරායේ රැඳී සිටියා.
එසේම, චීනය සිය විද්යාත්මක පර්යේෂණ යාත්රාව වන Xiang Yang Hong 3 සඳහා 2024 ජනවාරි 5 සිට දකුණු ඉන්දියානු සාගරයේ ගැඹුරු ජල ගවේෂණය කිරීමට අවසර ඉල්ලා සිටි අතර නව රෙගුලාසිවලට අනුකූලව රජය එයට අවසර දුන්නේ නැත.
පසුව චීනය විසින් ශ්රී ලංකා රජයට සිය අප්රසාදය පළකර තිබුණා.
කෙසේවෙතත්, ශ්රී ලංකාව නව රෙගුලාසි ප්රකාශයට පත් කිරීමටත් පෙර ජර්මනිය සිය යාත්රාව සඳහා අවසර ඉල්ලා තිබු නමුත් දැන් ක්රියාත්මක තහනම අනුව රජය එම නෞකාවේ පර්යේෂණ කටයුතු තහනම් කර තිබෙනවා.