ලංකා ඉතිහාසයේ ලොකුම පාවාදීම සිදු කළේ ගෝඨාභය රාජපක්ෂ විසින් බව බව පිවිතුරු හෙළ උරුමයේ නායක නීතිඥ උදය ගම්මන්පිල මහතා පවසනවා.
“77න් ඇරැඹි පරාධීන ආර්ථික මාවතෙන් ගැලවීමට එක්වව්!” යන තේමාව යටතේ උත්තර ලංකා සභාව විසින් පසුගියදා (23) මහරගම තරුණ සේවා සභා ශාලාවේදී පවත්වන ලද ජන සමුළුව අමතමින් ඔහු මේ බව සඳහන් කළා.
උදය ගම්මන්පිල මහතා මෙහිදී සඳහන් කර ඇත්තේ ඉතා වෙහෙසක් ගෙන රනිල් වික්රමසිංහ මහතා ඉවත් කිරීමෙන් අනතුරුව ඔහුටම නැවත ආණ්ඩුවේ නායකත්වය භාරදීම තරම් පාවාදීමක් ලංකා ඉතිහාසයේ කිසි දිනෙක සිදු වී නොමැති බවයි.
මෙහිදී වැඩිදුරටත් අදහස් දැක් වූ හෙළ උරුමයේ නායක උදය ගම්මන්පිල මහතා,
“දැන් ඔන්න සිරිසේන ජනාධිපතිවරයා කියනවා පාස්කු ප්රහාරය කළේ කවුද කියලා මම දන්නවා, අධිකරණය නියෝග කළොත් තොරතුරු හෙළි කරනවා කියලා. දයාසිරි ජයසේකර මැතිතුමනි, ඩාර්ලි පාරට ගිහින් නායකත්වය භාර ගන්න දැන් ලැහැස්ති වෙන්න.”
සිරිසේන මහත්තයා ගෙදර යවලා සෞභාග්ය ඇති කරන්න කියලා ගෝඨාභය මහත්තයා ගෙනාවා. එයාගේ අතීත ප්රගති වාර්තාව හොඳ නිසා ඇත්තටම සෞභාග්ය ගෙනේවි කියලා ලක්ෂ 69ක් ජනතාව හිතුවා. අන්තිමට මොකද වුණේ? එයා ඇමෙරිකානුවෝ දෙන්නෙකුට යට වුණා. එයා රට පාලනය කළේ ලක්ෂ 69 සිතුම් පැතුම් ඉටුකරන්න නොවේ. බැසිල් රාජපක්ෂ, ජූලියා චං කියන ඇමෙරිකානුවන් දෙන්නාගේ සිතුම් පැතුම් ඉටු කරන්න.
ගෝඨාභය රාජපක්ෂ තමයි ලංකා ඉතිහාසයේ ලොකුම පාවාදීම කළේ. අපි පසුගිය වසර 30ක් දේශපාලනය කළේ රනිල්ට විරුද්ධව. අපි ඒකාබද්ධ විපක්ෂය හැදුවේ රනිල් එළවන්න. අපි ගෝඨාභය ඡන්දයට දැම්මේ රනිල් එළවන්න. ලක්ෂ 69ක් ජනතාව
ගෝඨාභයට ඡන්දය දුන්නේ රනිල් එළවන්න. එයාට බැරි නම් එයා ගෙදර ගියාට අපට කමක් නෑ. නමුත් අපේ ප්රධානම සතුරා රනිල්. අපි මහන්සියෙන් එළවාගත්ත රනිල්ට ආණ්ඩුවේ නායකත්වය භාරදීම තරම් පාවාදීමක් ලංකා ඉතිහාසයේ කවදාවත් වෙලා නෑ.”