තම බිරිදට මන්නයකින් පහර දී ඝාතනය කිරීමේ චෝදනාවට මරණ දඬුවම නියම වී වසර 12 ක කාලයක් පොලීසිය හා අධිකරණය මග හරිමින් සිටි පුද්ගලයෙකු මාතර අපරාධ කොට්ඨාසය විසින් අත්අඩංගුවට ගෙන තිබෙනවා.
ඒ සැකකරු වැලිගම – හේන්වල ප්‍රදේශයේ විහාරස්ථානයක රැඳී සිටියදීයි.
අම්බලන්ගොඩ – මිටියාගොඩ ප්‍රදේශයේ පදිංචිකරුවෙකු වන මෙම පුද්ගලයා 2012 වසරේ දී තම 37 හැවිරිදි බිරිදට මන්නයකින් පහරදී ඝාතනය කර තිබුණා.
පසුව මීටියාගොඩ පොලීසිය ඔහුව සැකපිට අත්අඩංගුවට ගෙන අධිකරණය ඉදිරිපත් කිරීමෙන් අනතුරුව රක්ෂිත බන්ධනාගාරගත කිරීමට කටයුතු කර තිබුණා.
වසරකින් පසු ඇප ලැබීමෙන් අනතුරුව ඔහු අතුරුදන්ව තිබූ අතර විත්තිකරු නොමැතිව බලපිටිය මහාධිකරණයේ විභාග වූ නඩුවේ දී ඔහුට මරණ දඩුවම නියම කරනු ලැබුවා.
කෙසේ වෙතත් දඩුවම ක්‍රියාත්මක කිරීමට නොහැකි වූයේ, පොලිසියට ඔහුට සොයා ගැනීමට නොහැකි වීම හේතුවෙන්.
ඔහු වැලිගම විහාරස්ථානයක සැකකරු සැගව සිටින බවට ලද තොරතුරකට අනුව මාතර අපරාධ කොට්ඨාසයේ විශේෂ පොලිස් කණ්ඩායමක් එම ස්ථානයට ගොස් තිබුණා.
එහිදී සැකකාර පුද්ගලයා පලා ගොස් ඇති අතර, පොලීසිය කිලෝ මීටරයක් පමණ දුරක් ලුහුබැඳ ගොස් සැකකරු අත්අඩංගුවට ගෙන තිබූ බවයි වාර්තා වන්නේ.
