කොළඹ පෞද්ගලික රෝහලක ප්රතිකාර ලබමින් සිටි 89 හැවිරිදි පුද්ගලයෙකු පැහැරගෙන ගිය බවට පැවසෙන කොළඹ ජාවත්ත ප්රදේශයේ කාන්තාවක් ඇප මත මුදා හැරීමට කොළඹ අතිරේක මහේස්ත්රාත් පසන් අමරසේන මහතා අද (01) නියෝග කළා.
මෙම 89 හැවිරිදි පුද්ගලයා කලක් විදේශගත රැකියාවක නිරතව සිට මෙරටට පැමිණ ඇති අතර ලංකාවට පැමිණීමෙන් අනතුරුව ඔහුට ඇප උපස්ථාන කළ 58 හැවිරිදි පැමිණිලිකාර කාන්තාව විවාහ කරගෙන තිබෙනවා.
සැමියාට අසනීප වීමෙන් අනතුරුව විවාහක බිරිඳ විසින් ඔහුව ප්රතිකාර සඳහා කොළඹ පෞද්ගලික රෝහලකට ඇතුළත් කර තිබෙනවා.
එසේ රෝහලේ ප්රතිකාර ලබමින් සිටින අතරතුර ඥාතියකු බව පැවසෙන විත්තිකාර කාන්තාව ඇතුළු පිරිසක් රෝහල් බලධාරීන්ට නොදන්නවා ඔහුව එම රෝහලෙන් රැගෙන ගොස් ගල්කිස්ස ප්රදේශයේ පෞද්ගලික රෝහලක් වෙත ඇතුලත් කර තිබෙන බව නාරාහේන්පිට පොලිසිය අධිකරණයට කරුණු දක්වමින් පැවසුවා.
අදාල පුද්ගලයා ගල්කිස්ස රෝහලේ ප්රතිකාර ලබමින් සිටියදී මියගොස් ඇති බවත් මිය යාමෙන් අනතුරුව විත්තිකාර කාන්තාව ඇතුළු පවුලේ ඥාතීන් විසින් අවසන් කටයුතු කර තිබෙන බවද පොලිසිය අධිකරණයට දන්වා සිටියා.
පොලිසිය අධිකරණය හමුවේ පවසා සිටියේ මෙලෙස පැහැරගෙන ඇත්තේ දේපළ අත්පත් කර ගැනීමේ අරමුණින් ද යන්න පිළිබඳව තවදුරටත් විමර්ශන සිදු කරන බවයි.
තම ඥාතියාට ඇප උපස්ථාන කළ කාන්තාව ඔහු විසින් විවාහ කරගෙන ඇති බව පවුලේ කිසිවකුත් නොදන්නා බවත් ඔහු මිය යාමෙන් අනතුරුව ඔහුගේ අවසන් කටයුතු සිදුකළ බවද සැකකාරිය වෙනුවෙන් පෙනී සිටි නීතිඥවරයා අධිකරණයට දැනුම්දී තිබුණා.
දෙපාර්ශවයේ කරුණු සලකා බැලූ මහේස්ත්රාත්වරයා සැකකාර කාන්තාවට ඇප නියම කරණු ලැබුවා.