සර්වජන බලය ලැබී බොහෝ කාලයක් ගත වුවද ලංකාව තුළ ලේ උරුමයෙන් දේශපාලන නායකයන් තෝරා ගැනීමේ ක්‍රමය වෙනස් වී නොමැති බව ජාතික ජන බලවේගයේ නායක අනුර කුමාර දිසානායක මහතා පවසනවා.
ඒ ඊයේ (05) පැවති ජාතික ජන බලවේගයේ නිකවැරටිය ගොවි සමුළුවට එක්වෙමින්.
ලංකාවේ දේශපාලන බලය පවුල් කිහිපයක් මත කේන්ද්‍රගත වී ඇති බවත් එවැනි දූෂිත ප්‍රභූ කණ්ඩායම් අතර මාරුවෙන් මාරුවට මෙම බලය හුවමාරු වී ඇති බවත් අනුර කුමාර දිසානයක මහතා මෙහිදී සඳහන් කළා.
ඔහු මෙහිදී තවදුරටත් පවසා සිටියේ, ජාතික ජන බලවේගයේ ආණ්ඩුවකින් පළමුව අවධානය යොමු කරන්නේ ආහාර, අධ්‍යාපනය, සෞඛ්‍ය ජනතාවගේ මූලික අවශ්‍යතා සපුරාලීම සඳහා බවයි.
ජාතික ජනබලවේගයේ ආර්ථික ප්‍රතිපත්තිය , ජනතාවත් ජන ජීවිතයත් උසස් කිරීම සඳහා නිර්මාණය වූවක් බව අනුර කුමාර දිසානයක මහතා මෙහිදී අවධාරණය කළා.
එමෙන්ම, ඔහු තවදුරටත් පවසා සිටියේ ජාතික ජන බලවේගයේ පාලනයක් යටතේ කෘෂි කර්මාන්තය වෙනුවෙන් වැඩි අවධානයක් යොමු කිරීමට අපේක්ෂා කරන අතර ආහාර නිෂ්පාදන ක්‍රියාවලිය සවීමත් කිරීම සඳහා ප්‍රමුඛතාවය ලබා දෙන බවයි.
එහිදී වැඩිදුරටත් අදහස් දැක්වූ අනුර කුමාර දිසානායක මහතා,
“ ඡන්ද බලය ලැබුන කියලා අපේ රටේ ලේ උරුමයෙන් එන ගමන නතර වුණේ නැහැ. සජිත් ප්‍රේමදාස ප්‍රේමදාසගේ පුතා නොවෙන්න නිකවැරටිය ප්‍රාදේශීය සභාවටවත් හරියන්නෙ නැහැ. එයාට ජනාධිපති අපේක්ශකයෙක් වෙන්න එකම සුදුසුකම තාත්ත ජනාධිපති වීම. නාමල් රාජපක්ෂ, ඊට හපන් එකම සුදුසුකම තාත්ත ජනාධිපති වීම.”
“අද ජනතාවගේ අපේක්ෂාව තමයි වෙනසක් ඕන කියන එක. මේ වෙනස වෙනුවෙන් ඉන්න එක් කෙනෙක් සජිත් ප්‍රේමදාස. එයා ගන කියන්නෙ එයාගෙ පක්ෂ සභාපති ෆොන්සේකා මහත්මයා. ෆොන්සේකාට තමයි සජිත් ප්‍රේමදාසගෙ ආණ්ඩුවෙ හොරු අල්ලන්න භාර දෙන්නෙ කියල සජිත් කිව්වා. ෆොන්සේකා ආණ්ඩුව ගන්න කලින් හොරෙක් ඇල්ලුව, සජිත්ව.. ඒ නිසා ඒ ගැන කියල වැඩක් නෑ. පාසල්වලට ගිහිල්ල 5 පන්තියේ ළමයි එකතු කරගෙන හැමෝම දන්නවා හරයක් නැති බරක් නැති ඔහේ කියවන කෙනෙක් කියලා. මේ වැරදීම් නෙවෙයි.එයාගෙ හැටි.”
