එළඹෙන ජනාධිපතිවරණයේදී රනිල් වික්‍රමසිංහ ජනාධිපතිවරයාට පොදු ජන එක්සත් පෙරමුණේ සහයෝගයද නොලැබෙන බව පෙනෙන්නට ඇති බව කුරුණෑගල දිස්ත්‍රික් මන්ත්‍රී තුෂාර ඉඳුනිල් මහතා පවසනවා.
අද (24) පාර්ලිමේන්තුව අමතමින් ඔහු මේ බව සඳහන් කළා.
එක දවසක් හෝ බලයේ රැඳී සිටීමේ අරමුණෙන් මැතිවරණ රටාව වෙනස් කරමින් සමාජයේ පවතින සන්සුන් බවට බාධා කිරීමට රනිල් වික්‍රමසිංහ මහතා උත්සාහ කරන බව තුෂාර ඉඳුනිල් මන්ත්‍රීවරයා මෙහිදී පවසා සිටියා.
ඔහු තවදුරටත් අදහස් දක්වමින් සඳහන් කළේ, සමගි ජන බලවේගයෙන් ඉවත් වී ජනාධිපතිවරයාට සහය දක්වන කවුරුන් හෝ සිටී නම් ඒ සරත් ෆොන්සේකා සහ රාජිත සේනාරත්න පමණක් බවයි.
“රනිල් වික්‍රමසිංහ මහතාට පොදු ජන එක්සත් පෙරමුනේ සහයෝගය ලැබෙන්නෙ නැති තත්වයක් පේන්න තියෙනවා. පොහොට්ටුවේ මත දෙකක්. අපේ මන්ත්‍රීවරු එනව කියල පාව දෙන්නත් එපා. අපෙන් එනවා නම් එන්නේ සත් ෆොන්සේකයි රාජිතයි විතරයි. අපේ අනිත් මන්ත්‍රීවරු එන්නෙ නැහැ.දැන් ඒ දෙන්නම බටයක් ඇතුළෙ හිර වෙලා ඉන්නෙ. බටේ එහා පැත්තට යන්නත් බැහ.මෙහා පැත්තට යන්නත් බැහැ.”
