දේශබන්දු තෙන්නකෝන් මහතා පොලිස්පති ධූරයේ කටයුතු කිරීම වළක්වාලමින් ශ්‍රේෂ්ඨාධිකරණය නිකුත් කළ අතුරු තහනම් නියෝගය පිළිබඳ දරන ස්ථාවරය වෙනස් කරන ලෙස ජාතික සාම මණ්ඩලය රජයෙන් ඉල්ලා සිටිනවා.
නිවේදනයක් නිකුත් කරමින් එම මණ්ඩලය පෙන්වා දී ඇත්තේ ප්‍රජාතන්ත්‍රවාදයේ සහ නීතියේ ආධිපත්‍යය තහවුරු කරමින් රජය ශ්‍රේෂ්ඨාධිකරණ තීන්දුවට අනුව කටයුතු කළ යුතු බවයි.
දේශබන්දු තෙන්නකෝන් මහතා වෙත ලබා දුන් ශ්‍රේෂ්ඨාධිකරණ තීන්දුව ක්‍රියාත්මක කිරීම ප්‍රතික්ෂේප කිරීම තුළින් රජයේ නොසැලකිලිමත්කම, වගකීම් විරහිත බව පෙන්නුම් කරන අතරම එම හැසිරීමෙන් නීතියේ ආධිපත්‍යයටද සෘජුවම තර්ජන එල්ල වී ඇති බව ජාතික සාම මණ්ඩලය අවධාරණය කරනවා.
ශ්‍රේෂ්ඨාධිකරණ තීන්දුවට අනුව කටයුතු නොකිරීමට රජය ගෙන යන ක්‍රියා කලාපය නීති ගරුක පුරවැසියන් කණස්සල්ලට පත් කර ඇති බවත් රටේ ඉහළම අධිකරණය විසින් ලබා දුන් තීන්දුව නොසලකා හරිමින් දේශබන්දු තෙන්නකෝන් මහතා තවදුරටත් පොලිස්පති ධූරයේ කටයුතු කළ යුතු බවට රජය තීරණය කර ඇති බවත් ජාතික සාම මණ්ඩලය පෙන්වා දෙනවා.
එම නිවේදනයෙන් ජාතික සාම මණ්ඩලය තවදුරටත් අවධාරණය කර ඇත්තේ වත්මන් රජය විසින්, ජනාධිපතිවරයා, පාර්ලිමේන්තුව සහ අධිකරණය අතර බලතල මත රඳාපවතින පාර්ලිමේන්තු ප්‍රජාතන්ත්‍රවාදයේ මූලික ධර්මතා නොසලකා හරිමින් කටයුතු කරන බව පෙනී යන බවයි.
රජය ප්‍රදර්ශනය කරන මෙම හැසිරීමෙන් නීති පද්ධතිය කෙරෙහි මහජන විශ්වාසය පළුදු වීමේ අවධානමක් මතු කරන බවත් ඉන් රජයේ අනෙකුත් මට්ටම්වල නිලධාරීන්ට වැරදි පූර්වාදර්ශයක් ලබා දෙන බවත් එම මණ්ඩලය තවදුරටත් සඳහන් කරනවා.
.
