විදෙස් ගමන් බලපත්‍ර නිකුත් කිරීමේදී ඇතිව තිබෙන ප්‍රමාදය සම්බන්ධයෙන් රජයේ අමාත්‍යවරයෙකු ලෙස තමා ජනතාවගෙන් සමාව ඉල්ලන බව විදේශ කටයුතු අමාත්‍ය අලී සබ්රි මහතා පවසනවා.
විදේශ ගමන් බලපත්‍ර ලබාදීම දිගින් දිගටම ප්‍රමාද වීම හේතුවෙන් මේ වන විට මහජනතාව දැඩි අසීරුතාවයට පත්ව තිබෙනවා.
ඒ අනුව දින ගණනාවක් පෝලිම්වල රැදී සිටිමින් අපාදුක් විදින ජනතාව වත්මන් ආණ්ඩුවට දැඩිව දෝෂාරෝපනය කරන අයුරු දක්නට ලැබුණා.
පෝලිම් යුගය අවසන් කළ බව දක්වමින් ජනාධිපතිවරයා ප්‍රචාරණ කටයුතු සිදුකළද තවමත් ඇස්පනාපිට පෝලිම් දක්නට ලැබීම විශේෂත්වයක්.
මේ අතර, ආගමන විගමන දෙපාර්තමේන්තුව පවසන්නේ අද (28) සිට දෛනිකව විදෙස් ගමන් බලපත්‍ර 1,000 බැගින් නිකුත් කිරීමට පියවර ගන්නා බවයි.
විදෙස් ගමන් බලපත්‍ර ලබාගැනීමේ අපේක්ෂාවෙන් බත්තරමුල්ල ආගමන හා විගමන දෙපාර්තමේන්තුවේ ප්‍රධාන කාර්යාලය අසළ දින ගණනාවක සිට පිරිස් රැඳී සිට තිබුණා.
ඒ අතරින් බොහෝදෙනා ඊයේ රාත්‍රියද එම ස්ථානයේම පහන් කර ඇති බව වාර්තා වෙනවා.
මේ අතර දින ගණනාවක මෙලෙස රැඳී සිටින පිරිස් වෙත ටෝකන් පත් ලබාදීමට පියවර ගැනුණා.
