ඉදිරි ජනාධිපතිවරණයේදී විපක්ෂ නායක සජිත් ප්රේමදාස මහතාට සහාය පළ කිරීමට තමන් තීරණය කළ බව ශ්රී ලංකා පොදුජන පෙරමුණේ පාර්ලිමේන්තු මන්ත්රී ජගත් කුමාර මහතා පවසනවා.
ඔහු පසුගිය මැතිවරණයෙන් කඩුවෙල ආසනයෙන් කොළඹ දිස්ත්රික්කය නියෝජනය කරමින් පාර්ලිමේන්තුවට පිවිසුණා.
දිළිඳුකම පිටුදැකීම හා සමෘද්ධි ව්යාපාරයට අදාල සියලු කටයුතු සම්බන්ධීකරණ ප්රධානියා ලෙස ඔහුව පත්කිරීමට සජිත් ප්රේමදාස මහතා තීරණය කර ඇති බවද වාර්තා වෙනවා.
ජගත් කුමාර සුමිත්රාආරච්චි මන්ත්රීවරයා, සමස්ත ලංකා සමෘද්ධි සංවර්ධන හා කෘෂිකර්ම පර්යේෂණ නිෂ්පාදන සහකාර නිලධාරි සංගමයේ ප්රධාන ලේකම්වරයාද වෙනවා.
කෙසේවෙතත් ජගත් කුමාරගේ සමගි ජනබලවේග ආගමනයත් සමඟ ගැටළු රැසක් පැනනැගී තිබෙනවා.
ඒ ජගත් කුමාර කඩුවෙල ආසනය නියෝජනය කරන මන්ත්රීවරයෙක් වීම හේතුවෙන්.
මේ වන විට සමගි ජනබලවේගය පක්ෂයේ කඩුවෙල ආසන සංවිධායකවරිය ලෙස හිරුණිකා ප්රේමචන්ද්ර මහත්මිය කටයුතු කරනවා.
ජගත් කුමාරගේ පැමිණීමත් සමග ඇයගේ ආසන සංවිධායක ධූරයද ඉදිරියේදී අභියෝගයට ලක්වීමේ අවධානමක් පවතින බවට තොරතුරු වාර්තා වනවා.
හිරුණිකා ප්රේමචන්ද්ර මහත්මියට සමගි ජනබලවේගය පක්ෂය තුළ යම් යම් මදිපුංචිකම් රැසක් සිදුවන බවට News19 වෙත තොරතුරු වාර්තා වුණා.
හරීන් ප්රනාන්දු මහතාගෙන් හිස්වූ ජාතික ලැයිස්තු පාර්ලිමේන්තු මන්ත්රී ධූරයද පෞද්ගලික නාලිකාවක හිමිකරුගේ විරෝධය නිසාවෙන් ඇයට ලබානොදීමට පක්ෂ නායකයා කටයුතු කිරීම හේතුවෙන් ඇයගේ පාක්ෂිකයන්ද මේ වන විට දැඩි කළකිරීමෙන් පසුවනවා.
තත්ත්වය මෙසේ තිබියදී ජගත් කුමාර මන්ත්රීවරයාද සමගි ජනබලවේගය පක්ෂයට එක්වීමෙන් පක්ෂයේ අභ්යන්තර අර්බුද තවදුරටත් වර්ධනය වීමට ඉඩ ඇති බවයි වාර්තා වන්නේ.