පොලිස් සැරයන්වරයකුට පහරදී තුවාල කිරීම සම්බන්ධයෙන් එකම පවුලේ සහෝදරයන් තිදෙනකු ඇතුළු හතර දෙනකු අත්අඩංගුවට ගත් බව ඇඹිලිපිටිය පොලිසිය පවසනවා.
බීමතින් පැමිණි පිරිසක් ඇඹිලිපිටිය ප්‍රදේශයේ කාන්තාවකට පහරදුන් බවට ලද පැමිණිල්ලකට අනුව පොලිස් නිලධාරීන් කණ්ඩායමක් එම ස්ථානයට ගිය අවස්ථාවේදී මෙම පහරදීම සිදුවී තිබුණා.
මෙලෙස අත්අඩංගුවට ගෙන ඇත්තේ අවුරුදු 19,23 සහ 30 වයස්වල පසුවන කුඹුගොඩ ආර, ඇඹිලිපිටිය ප්‍රදේශයේ පදිංචි සිවු දෙනකු බවයි පොලීසිය පවසන්නේ.
එහිදී එම නිවෙස ඉදිරිපිට සිටි සැකකරුවන්ට ප්‍රකාශයක් ලබාදීම සදහා පොලිස් ස්ථානය වෙත පැමිණෙන ලෙසට දැනුම් දුන්නද එම අවස්ථාවේ බීමතින් සිටි සැකකරුවන් පොලිස් ස්ථානයට පැමිණීම ප්‍රතික්ෂේප කර ඇති බව පොලිසිය පවසනවා.
පොලීසිය පවසන්නේ, අනතුරුව සැකකරුවන් අත්අඩංගුවට ගෙන ත්‍රිරෝද රථයට නංවාගැනීමට යාමේදී සැකකරුවන් විසින් පොලිස් සැරයන්වරයකුට පහරදී අත්අඩංගුවෙන් මිදී පලායාමට උත්සාහ කර ඇති බවයි.
එහිදී සැකකරුවන් සිවු දෙනා අත්අඩංගුවට ගෙන ඇති අතර පහරදීමෙන් තුවාල ලැබූ පොලිස් සැරයන්වරයා ඇඹිලිපිටිය රෝහලට ඇතුළත් කර තිබෙනවා.
අත්අඩංගුවට ගත් සැකකරුවන් අධිකරණයට ඉදිරිපත් කිරීමට නියමිත බවයි පොලීසිය පවසන්නේ.
ඇඹිලිපිටිය දිසාව බාර ජ්‍යෙෂ්ඨ පොලිස් අධිකාරී සතිෂ් ගමගේ මහතාගේ උපදෙස් පරිදි ඇඹිලිපිටිය මූලස්ථාන පොලිසිය වැඩිදුර විමර්ශන සිදුකරනු ලබනවා.
