තමා සංචාරක රාජ්ය ඇමති ලෙස කටයුතු කළ කාලය තුළ වාහන කිහිපයක් ලබාදුන් බවත්, එහෙත් එම සියලු වාහන අබලන් තත්ත්වයේ පැවති ඒවා බවත් හිටපු රාජ්ය ඇමතිනි ඩයනා ගමගේ මහත්මිය පවසනවා.
V8 වර්ගයේ මෝටර් රථයක් ජනාධිපති ලේකම් කාර්යාලයෙන් තමන්ට ලබා දී තිබුණේ, ඊට පෙර ලබා දී තිබුණු මෝටර් රථ සියල්ල විවිධ හේතූන් මත කාර්මික දෝෂයන්ට ලක්වීම හේතුවෙන් බව ඇය සඳහන් කළා.
එහිදී ඇය වැඩිදුරටත් කියා සිටියේ,
“මට වාහනයක් දුන්නා. මම රාජ්ය ඇමති වෙලා හිටියා සංචාරක. එතකොට සංචාරක කියන්නේ රට වටේම මම යන කෙනෙක්. මොකද සංචාරක ප්රශ්න විසඳන්න මේ ලංකාව වටේම මම යනවා. එතකොට මට ඔය අමාත්යංශයේ මම කියන්න ඕනේ මේක මම අදත් කියනවා, එදත් කිව්වා, ලංකාවේ සංචාරක ඇමතිවරියක් හැටියට ඔය අමාත්යංශයේ කිසිම වැඩක් කරගෙන යන්න ඉඩ දුන්නේ නැහැ. ඒකේ හිටපු නිලධාරීන්, ඒකේ හිටපු අතිරෙක ලේකම්ලා, එකේ හිටපු ලේකම්ලා මේකේ ඉන්නවා හොරු කණ්ඩායමක්. මම රටේ ජනාධිපතිගෙන් ඉල්ලනවා හොරු අල්ලන්න කියලා. මොකද මගේ ළගත් තියෙනවා මේකේ ඇතුළේ වෙච්ච නිලධාරීන්ගෙන් වෙලා තියෙන හොරකම්. මම මේක එක නාලිකාවකත් කිව්වා. මට දීපු හැම වාහනයක්ම හැමදාම කැඩෙනවා. එක සැරයක් මට දීපු ජීප් එකක ABS එක පුපුරලා. කොළොන්නාව පැත්තේ එක දවසක ABS එක පුපුරලා තව පොඩ්ඩෙන් මම හැප්පෙනවා. මුලු ඔයිල් ටිකම එළියට ඇවිල්ලා පාර පුරාම ගියා.
මම ඔෆිස් එකේ ඉදන් වැඩ කරන කෙනෙක් නෙවෙයි, නිලධාරීන්ගෙන් රිපෝට් අරගෙන වැඩකරන කෙනෙකුත් නෙවෙයි. මම ඒ තැනට ගිහිල්ලා ඒ ප්රශ්නේ විසඳන කෙනෙක්. එතකොට මට යන්න එන්න වාහනයක් තිබුණේ නෑ. මම මේගොල්ලොන්ගෙන් ඉල්ලලා ඉල්ලා තමයි මට ඔය වාහනේ දුන්නේ. මම ජනාධිපති ලේකම්තුමාට ගිහිල්ලා බැරිම තැන මගේ දුක කිව්වා. ඊට පස්සේ තමයි මට මේ වාහනේ දුන්නේ.”