මැතිවරණ කාලයක් ප්‍රකාශයට පත් කර ඇති පසුබිමක අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර මහතා, අපරාධ බුද්ධි විශ්ලේෂණ හා නිවාරණ කොට්ඨාසයේ අධ්‍යක්ෂවරයා ලෙස පත්කිරීම සම්බන්ධයෙන් ප්‍රජාතාන්ත්‍රීය ප්‍රතිසංස්කරණ හා මැතිවරණ අධ්‍යයන ආයතනය විසින් නිවේදනයක් නිකුත් කර තිබෙනවා.
එම ආයතනයේ විධායක අධ්‍යක්ෂ මංජුල ගජනායක මහතා අදාළ නිවේදනය මඟින් පෙන්වා දී ඇත්තේ, ශානි අබේසේකර මහතා කවර හෝ නිලයකට පත්කළ යුතුව තිබුනේ පාර්ලිමේන්තු මැතිවරණය අවසන්ව පැවැත්වීමට නියමිත පාර්ලිමේන්තුවේ පළමු සැසිවාරය පැවැත්වීමට යෝජිත 2024 නොවැම්බර් මස 21 වැනි දිනෙන් පසුව බවයි.
අදාළ තනතුර සම්බන්ධයෙන් ඔහුගේ දැනුම හා පරිචය සම්බන්ධයෙන් ගැටලුවක් නොවන නමුත් ඔහුගෙ පත්කිරීම සිදු කර ඇත්තේ පාර්ලිමේන්තු මැතිවරණයක් ප්‍රකාශ කොට ඇති කාල වකවානුවකදීය යන කාරණය අමතක නොකළ යුතු බව මංජුල ගජනායක මහතා තවදුරටත් අවධාරණය කරනවා.
ජනාධිපතිවරණයට පෙර ජාතික ජනබලවේගයට සහය පළ කරමින් දැඩි දේශපාලන ක්‍රියාකාරිත්වයක් පෙන්නුම් කරන ලද ලද රාජ්‍ය නිවේදිත නිලධරයෙක්, තවත් තීරණාත්මක මැතිවරණ ප්‍රචාරක කාල සීමාවක් තුළ පොලිස් ඒකකයක අධ්‍යක්ෂ ධූරයක් සඳහා පත්කිරීම අතිශය විවාදාත්මක මෙන්ම ප්‍රශ්නගත තීරණයක් බව ප්‍රජාතාන්ත්‍රීය ප්‍රතිසංස්කරණ හා මැතිවරණ අධ්‍යයන ආයතනය තවදුරටත් පෙන්වා දෙනවා.
අපරාධ පරීක්ෂණ දෙපාර්තෙම්න්තුවේ හිටපු අධ්‍යක්ෂවරයෙකු වූ ශානි අබේසේකර ව වසරක කාලයක් සඳහා කොන්ත්‍රාත් පදනම මත පසුගිය ඔක්තොම්බර් 10 වන දින අපරාධ බුද්ධි විශ්ලේෂණ හා නිවාරණ කොට්ඨාසයේ අධ්‍යක්ෂවරයා ලෙස පත් කරනු ලැබුවා.
