කොළඹ කොටුව සහ මඩකලපුව අතර අද (18) දිනට නියමිත සියලුම දුම්රිය ගමන්වාර අවලංගු කර තිබෙනවා.
කොලොන්නාව තෙල් ගබඩා පර්යන්තයේ සිට මඩකලපුව බලා ඉන්ධන ප්‍රවාහනය කළ දුම්රියක වනඅලි රංචුවක් ගැටීමෙන් අද අලුයම සිදු වූ අනතුරෙන් දුම්රිය මාර්ගයට දැඩි හානි සිදුවීම හේතුවෙන් දුම්රිය දෙපාර්තුමේන්තුව මෙම පියවර ගෙන තිබෙනවා.
මින්නේරිය සහ හිගුරක්ගොඩ දුම්රිය ස්ථාන අතර ප්‍රදේශයකදි අද අලුයම 3.30ට පමණ මෙම අනතුර සිදුව තිබු අතර එහිදී දුම්රියේ ඉන්ධන ටැංකි හතරක් පිළි පැන ඉන් දෙකක් පෙරළී ගොස් තිබුණා.
මෙම අනතුරින් වනඅලියෙකු මිය ගොස් තවත් වනඅලි කිහිප දෙනෙකු බරපතළ තුවාල ලබා ඇති අතර ඉන්ධන ප්‍රවාහන තෙල් ටැංකි පෙරලීමෙන් දුම්රිය මාර්ගයට දැඩි හානි සිදුව ඇති බව දුම්රිය දෙපාර්තමේන්තුව සඳහන් කරනවා.
මේ හේතුවෙන්, අද උදෑසන කොළඹ කොටුව සිට මඩකලපුව බලා ධාවනය වීමට නියමිතව තිබු දුම්රිය සහ මඩකලපුව සිට කොළඹ කොටුව බලා ධාවනය වීමට නියමිතව තිබු දුම්රියන් දෙක අවලංගු කර කිරීමට දුම්රිය දෙපාර්තමේන්තුව පියවර ගෙන තිබුණා.
