ඊශ්‍රායලය ඉරානයට හමුදා ප්‍රහාරයක් එල්ල කිරීමට සූදානම් බවත්, ඊශ්‍රායලය එම ප්‍රහාරය එල්ල කරන ආකාරය පිළිබඳවත්, ඇමෙරිකන් බුද්ධි අංශ සකස් කළ අතිශය රහස් වාර්තා දෙකක්, මේ වනවිට ප්‍රසිද්ධියට පත් වී තිබෙනවා.
රහස් වාර්තා ප්‍රසිද්ධ වීමත් සමඟ මහත් ආන්දෝලනයක් නිර්මාණය වී ඇති බවයි ඇමෙරිකන් මාධ්‍ය වාර්තා පෙන්වා දෙන්නේ.
මෙම අතිශය රහස් වාර්තා ඇමෙරිකන් බුද්ධි අංශ විසින් සකස් කරනු ලැබ ඇත්තේ පසුගිය ඔක්තෝබර් 15 සහ 16 වැනිදායි.
පසුගිය දා ඒවා ටෙලිග්‍රෑම් සමාජ මාධ්‍ය ඔස්සේ, ඉරාක හිතවාදීන් අතරේ ප්‍රසිද්ධියට පත් වී තිබූ බවයි එරට මාධ්‍ය වාර්තා කරන්නේ.
මෙම අතිශය රහස් වාර්තා ප්‍රසිද්ධියට පත්වූයේ කෙසේදැයි යන්න සෙවීමට ඇමෙරිකන් ආරක්ෂක අංශ මේ වනවිටත් කඩිනමින් විමර්ශන ආරම්භ කර ඇති බවද වාර්තාවනවා.
එමෙන්ම ඉරාන උත්තරීතර නායක අයතුල්ලා අලී කමේනී ඉලක්ක කර ගනිමින් ප්‍රහාරයක් එල්ල කරන බවට ඊශ්‍රායලය අනතුරු අඟවා තිබෙනවා.
ඊශ්‍රායලය මෙම අනතුරු ඇඟවීම කළේ ඉරානය පසුගිය පළමු වැනිදා ඊශ්‍රායලයට මිසයිල වරුසාවකින් ප්‍රහාර දීමට උත්සාහ ගැනීමෙන් පසුවයි.
එම මිසයිල ප්‍රහාරය ව්‍යර්ථ කර ගැනීමට ඊශ්‍රායල හමුදාව සමත් වුණා.
