ආන්දෝලනයට තුඩුදුන් පහ ශ්‍රේණිය ශිෂ්‍යත්ව විභාගයේ පළමු ප්‍රශ්න පත්‍රය සම්බන්ධයෙන් සිය නිර්දේශ කඩිනමින් යොමු කරන බව මානව හිමිකම් කොමිසම පවසනවා.
එහි කොමසාරිස් නීතිඥ නිමල් පුංචිහේවා මහතා සඳහන් කළේ, ප්‍රශ්න පත්‍රයේ ප්‍රශ්න කිහිපයක් පිටවීම සම්බන්ධයෙන් අපරාධ පරීක්ෂණ දෙපාර්තමේන්තුව(Cඓඪ්) සිදුකළ විමර්ශනයේ වාර්තාව කොමිසමට ලැබී ඇති බවයි.
එම වාර්තාව අධ්‍යනය කිරීමෙන් පසු සිය කොමිසමේ නිර්දේශ විභාග දෙපාර්තමේන්තුවට යොමු කරන බව, ඔහු සඳහන් කළා.
මේ අතර, විභාග කොමසාරිස් ජනරාල් අමිත් ජයසුන්දර මහතා සදහන් කළේ, මානව හිමිකම් කොමිසමේ නිර්දේශ ලැබෙන තුරු පහ ශ්‍රේණිය ශිෂ්‍යත්ව විභාගයේ පිළිතුරු පත්‍ර ඇගයීම සිදු නොකරන බවයි.
පිළිතුරු පත්‍ර ඇගයීම සඳහා සියලු සැලසුම් සකස් කර ඇති බව ඔහු ප්‍රකාශ කළා.
පහ ශ්‍රේණිය ශිෂ්‍යත්ව විභාගයේ පළමු ප්‍රශ්න පත්‍රයේ ප්‍රශ්න කිහිපයක් පිටවූ බව කියන සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව පසුගියදා විමර්ශනයක් ආරම්භ කළා.
ඉන් අනතුරුව විභාග දෙපාර්තමේන්තුව ප්‍රකාශ කළේ, විභාගයේ ප්‍රශ්න 03ක් පිටවී ඇති බවයි.
ඒ සඳහා නිදහස් ලකුණු ලබාදීමට තීරණය කර ඇති බව විභාග දෙපාර්තමේන්තුව සඳහන් කළා.
