2024 දෙසැම්බර් 19 දින “සංගණන දිනය” ලෙස නම් කර ඇති බවත් ඒ අනුව එම කාලය තුළ රටේ සෑම සංගණන ඒකකයකටම සංගණන නිලධාරියෙකු පැමිණ තොරතුරු රැස් කරනු ලබන බවත් ජන හා සංඛ්‍යාලේඛන දෙපාර්තමේන්තුවේ අධ්‍යක්ෂ ජනරාල් ඩී. ඩී. ජී.ඒ. සෙනෙවිරත්න මහත්මිය පවසනවා.
රජයේ ප්‍රවෘත්ති දෙපාර්තමේන්තුවේ ඊයේ (23) පැවති සාකච්ඡාවකදී අධ්‍යක්ෂ ජනරාල්වරිය මේ බව සඳහන් කළා.
ඇය එහිදී අවධාරණය කළේ සංගණන අඥා පනතට අනුව ලබා ගන්නා පෞද්ගලික තොරතුරුවල රහස්‍යභාවය සුරැකීමට සෑම සංගණන නිලධාරීයෙකුම බැඳී සිටීන බැවින් නිවැරදි තොරතුරු ලබා දීමට බිය නොවන ලෙසයි.
ඒ අනුව, එම කාලය තුළ රටේ සෑම ඒකකයක්ම ආවරණය වන ලෙස සංගණනය සිදු කෙරන බවත් 2024 ඔක්තෝම්බර් 07 නිල වශයෙන් සංගණනය ආරම්භ කර ඇති බවත් මේ වන විට ජන හා නිවාස සංගණනයේ තුන්වැනි අදියර වන පුද්ගල හා නිවාස ඒකක පිළිබඳ තොරතුරු රැස් කිරීම සිදු කරන බවත් අධ්‍යක්ෂ ජනරාල්වරිය පෙන්වා දුන්නා.
එමෙන්ම රටේ මැතිවරණයක් ප්‍රකාශයට පත් කර ඇති අවස්ථාවක තොරතුරු රැස් කරන බැවින් සංගණනය සඳහා නිවෙස්වලට යන නිලධාරීන් සංගණන අඥා පනතේ නීතිවලටත් මැතිවරණ කොමිෂන් සභාවේ නීතිවලටත් යටත්ව කටයුතු කරන බවට දිවුරුම් ලබා දී ඇති බවත් ඇය පවසා සිටියා.
තව ද, මෙම කාලය තුළදී සංගණන ක්‍රියාවලියෙහි තාක්ෂණික කටයුතු මෙහෙයවිම ජන හා සංඛ්‍යා ලේඛන දෙපාර්තමේන්තුව සිදු කරන අතර පරිපාලන කටයුතු දිස්ත්‍රික් ලේකම්/දිසාපති, ප්‍රාදේශීය ලේකම් ඇතුළු දිස්ත්‍රික් පරිපාලනය විසින් සිදු කරනු ලබන අතර මෙවර තොරතුරු රැස් කිරීම සඳහා රාජ්‍ය නිලධාරීන් ඇතුළුව නිලධාරීන් 35,000ක් පමණ මෙම ක්‍රියාවලියට යොදවා තිබෙනවා.
ශ්‍රි ලංකාවේ සංගණන ඉතිහාසයේ ප්‍රථමවරට පරිගණක තාක්ෂණය භාවිත කරමින් මෙවර සංගණන කාර්යය සිදු කරන බව අධ්‍යක්ෂ ජනරාල්වරිය සඳහන් කළා.
ඇය ප්‍රකාශ කළේ, අවසන් වරට සංගණයනයක් පවත්වා ඇත්තේ, 2012 වර්ෂයේ වන අතර ඒ අනුව, මෙවර සංගණනය පැවැත්වෙනුයේ වසර 12කට පසුව බවයි.
මෙම සංගණන ක්‍රියාවලියේදී සෑම සංගණන ඒකකයකට ම රතු පැහැති සංගණන ලේබලයක් අලවනු ලබන අතර, එක් එක් ඒකකයන්වල පදිංචි පුද්ගලයින්ගේ තොරතුරු සඳහන් කිරීමට කහ පැහැති පත්‍රිකාවක් අදාළ ඒකකයන්වලට ලබා දෙන අතර තොරතුරු රැස් කිරීමට සංගණන නිලධාරීන් පැමිණිවිට එම කහ පැහැති පත්‍රිකාව පුරවා දෙන ලෙස ත් අධ්‍යක්ෂ ජනරාල්වරිය ජනතාවගෙන් ඉල්ලා සිටිනවා.
