පක්ෂීන් සහ උරග විශේෂ නීති විරෝධී ලෙස මුහුදු මාර්ගයෙන් ප්රවාහනය කල 06 දෙනෙකුට රුපියල් විසිඅට ලක්ෂ අසුදාහක දඩයක් නියම කිරීමට ගාල්ල අතිරේක මහෙස්ත්රාත්වරිය නියෝග කර තිබෙනවා.
මෙලෙස දඩ නියම වූයේ මීගමුව සහ කොච්චිකඩේ යන ප්රදේශයන් හි පදිංචි ධීවරයින් පස් දෙනෙකු සහ ඉන්දියානු ජාතිකයෙකුට යි.
සැකකාර ධීවරයන් පස්දෙනා සහ ඉන්දියානු ජාතිකයා වරද පිළිගැනීමෙන් පසු එක් අයෙකුට රුපියල් හාර ලක්ෂ අසූ දහස බැගින් හයදෙනාට රුපියල් විසි අට ලක්ෂ අසූ දහසක දඩයක් නියම කිරීමට ගාල්ල අතිරේක මහෙස්ත්රාත් ලක්මිණි විදානගමගේ මහත්මිය ඊයේ (24) නියෝග කර තිබෙනවා.
මෙම සතුන් ප්රවාහනය කළ නාවික හමුදා භාරයේ තිබු ධීවර යාත්රාව රාජසන්තක කිරීමට නියෝග කළ මහේස්ත්රාත්වරිය දැනට ජාතික සත්වෝද්යානය භාරයේ තිබෙන සතුන් සියලුම දෙනාද රාජසන්තක කර දෙහිවල ජාතික සත්වෝද්යානයට බාරදෙන ලෙසද නියෝග කළා.
පක්ෂීන් සහ උරග විශේෂ ජාවාරමක් සම්බන්ධයෙන් නාවික හමුදාවට ලද තොරතුරක් මත කල මෙහෙයුමකදි දකුණු මුහුදේ යාත්රා කරමින් තිබූ සැකකටයුතු මෙරට බහුදින ධීවර යාත්රාව පසුගිය ජූලි මස 07 වැනි දින අත්අඩංගුවට ගෙන තිබුණා.
එහිදී එම බහුදින ධීවර යාත්රාව තුළ නීති විරෝධී ලෙස ප්රවාහනය කරමින් තිබූ දුර්ලභ ගණයේ පිඹුරන් 13 ක්, තලගොයෙක්, විශාල ඉබ්බෙක් සහ ගිරවුන් 03 ක් ඇතුළත්.
නාවික හමුදා භාරයට ගත් මෙම සතුන් සහිත බහුදින ධීවර යාත්රාව නාවික හමුදාව විසින් ගාල්ල වරායට රැගෙන පැමිණිමෙන් පසු හික්කඩුව වනජීවි සංරක්ෂණ දෙපාර්තමේන්තුව විසින් ඉකුත් ජුලි මස 09 වන දින සැකකරුවන් අධිකරණයට ඉදිරිපත් කර රිමාන්ඩ් කිරීමෙන් පසු ඇප මත මුදාහැර තිබුණා.
සිදු කළ විමර්ශනයේදී හෙළි වූ කරුණු අනුව මෙම සිද්ධියේ ප්රධාන සැකකරු ලෙස සැලකෙන මීගමුවේ පදිංචි පුද්ගලයෙකු හඳුනාගෙන ඔහු අත්අඩංගුවට ගැනීමට ගිය අවස්ථාව වන විටත් ඔහු මිය ගොස් ඇති බව අනාවරණය වූ බව වනජීවී නිලධාරීන් අධිකරණයට දැනුම් දුන්නා.
මෙම සිද්ධිය සම්බන්ධයෙන් හඳුනාගෙන සිටි ඉන්දියානු ජාතික සැකකරු ඉන්දියාවේ සිට මෙරටට පැමිණීමේදී අත්අඩංගුවට ගෙන අධිකරණයට ඉදිරිපත් කිරීමෙන් ඇප මත මුදාහැර තිබුණා.