ඉරානයේ තෝරාගත් මිලිටරි මධ්‍යස්ථාන කිහිපයක් ඉලක්ක කරගෙන ඊශ්‍රායලය විසින් අද (26) අළුයම ගුවන් ප්‍රහාරයක් එල්ලකළ බව විදෙස් මාධ්‍ය වාර්තා කරනවා.
ඉරාන අගනුවරට බටහිර සහ නිරිත දෙසින් පිහිටි හමුදා කඳවුරු ඉලක්ක කර මෙම ගුවන් ප්‍රහාර එල්ල කර ඇති බව සඳහන්.
ඊශ්‍රායල ආරක්ෂක අංශ පවසන්නේ, ඉරානය විසින් ඉකුත් ඔක්තෝබර් 1 වැනිදා එල්ල කළ බැලස්ටික් මිසයිල ප්‍රහාර 200කට ආසන්නයට ප්‍රහාරය ඇතුළුව, ඉරාන පාලනය මාස කිහිපයක සිට තමන්ට එරෙහිව සිදුකරන අඛණ්ඩ ප්‍රහාරවලට ප්‍රතිචාර දක්වමින් මෙම ප්‍රහාරය දියත්කළ බවයි.
ඊශ්‍රායලයට ප්‍රතිචාර දැක්වීමට අයිතියක් සහ යුතුකමක් ඇති බවත්, ආරක්ෂක සහ ප්‍රහාරාත්මක හැකියාවන් සම්පූර්ණයෙන්ම බලමුලු ගන්වා ඇති බවත් ඔවුන් වැඩිදුරටත් පවසනවා.
ඉරාන රාජ්‍ය මාධ්‍ය විසින්ද මෙම පිපිරීම් සම්බන්ධයෙන් වාර්තා කර තිබුණත් එමඟින් සැලකිය යුතු තරම් හානියක් සිදුව නොමැති බවත් එම ප්‍රහාර අසාර්ථක බවටත් කරුණු ඉදිරිපත් කර තිබෙනවා.
මේ අතර, මෙම ප්‍රහාර සඳහා ඇමරිකා එක්සත් ජනපදයේ සම්බන්ධයක් නොමැති බව එරට ආරක්ෂක අංශ විදෙස් මාධ්‍ය වෙත පවසා තිබුණා.
