මෙවර පාර්ලිමේන්තු මැතිවරණයට ඉදිරිපත් වන ගම්පහ බණ්ඩාරණායක විද්‍යාලයේ ආදී සිසුන් වන චාමර ජයසිංහ, රුවන් මාපලගම හා තිළිණ ජයවර්ධන එකම වේදිකාවකට පැමිණියා.
ගම්පහ දිස්ත්‍රික්කය තුළ නව දේශපාලන පරිච්ඡේදයකට මුල පුරමින් විවිධ දේශපාලන පක්ෂ නියෝජනය කරන ඔවුන් ඊයෙ (26) නිට්ටඹුව මන්දාර රෝයල් රිසෝර්ට් හී දී මෙලෙස එක්ව සිටියා.
පාර්ලිමේන්තු මන්ත්‍රීවරයෙකුගේ කාර්යභාරය, ප්‍රජාතන්ත්‍රවාදය, ඡන්ද ක්‍රම, රට වෙනුවෙන් සහ ගම්පහ දිස්ත්‍රික්කය වෙනුවෙන් ඔවුන් බලයට පැමිණි පසු මැදිහත් වන්නට අපේක්ෂා කරන ප්‍රතිපත්තිමය මැදිහත්වීම් සම්බන්ධයෙන් එහිදී ගැඹුරින් සංවාදයේ යෙදී තිබෙනවා.
හෝරා කීපයක් පැවැති මෙම දේශපාලන වැඩසටහන සාම්ප්‍රදායික විවාදයක් නොවී සාධනීය සංවාදයක් ලෙස සංවිධානය කරනු ලැබූයේ NAYAKANZ 2003 කණ්ඩායම විසින්.
සුරංග රණසිංහ මහතා විසින් මෙම වැඩසටහන මෙහෙයවනු ලැබුවා.
දේශපාලනය යනු පොරපිටියක් නොව උණුසුම් සහ සංවාදාත්මක, මහජන සුබ සිද්ධිය උදෙසා සිදුකළ යුතු වෘත්තීමය මැදහත්වීමක් බවට වන ආදර්ශය රටට පෙන්වු වැඩසටහනක් ලෙස මෙය බොහෝ දෙනාගේ පැසසුමට ලක්ව තිබෙනවා.
