යාපනයේ නල්ලූර් ප්‍රදේශයේ ඩෙංගු මර්දන කටයුතු සදහා ගිය නිලධාරීන් පිරිසකට ත්‍රිරෝද රථයක් තුළ තිබී මියගිය වයෝ වෘද්ධ පුද්ගලයෙකුගේ මළසිරුරක් හමු වී තිබෙනවා.
යාපනයේ තිරුණවේලි ප්‍රදේශයේ නිවසක් පරීක්ෂාවට ලක් කරමින් සිටියදී ත්‍රිරෝද රථය තුලට එබී බැලූ නිලධාරීන්ට මෙම මළ සිරුර දැක ගැනීමට හැකි වී ඇති බව වාර්තා වනවා.
සෞඛ්‍ය නිලධාරීන් වහාම මේ බව කෝපායි පොලිසියට දැනුම් දීමෙන් පසුව පොලිසිය පැමිණ එම පුද්ගලයාගේ මළ සිරුර යාපනය ශික්ෂණ රෝහල වෙත රැගෙන ගොස් තිබෙනවා.
මියගිය පුද්ගලයා 79 හැවිරිදි යාපනයේ කෙන්යාඩි ප්‍රදේශයේ පදිංචි සින්නතම්බි සිරිකුලන් බවට පොලීසියට තොරතුරු ලැබී ඇති අතර, ඔහු මිය යාමට හේතුව හෝ ඔහුගේ මළ සිරුර මෙම ත්‍රීරෝද රථය තුළට පැමිණියේ කෙසේද යන්න මෙතෙක් අනාවරණය වී නැහැ.
කෝපායි පොලීසිය පැවසුවේ, යාපනය ශික්ෂණ රෝහලේදී පැවැත්වීමට නියමිත පශ්චාත් මරණ පරීක්ෂණ කටයුතුවලින් පසුව මේ සම්බන්ධයෙන් ස්ථිර යමක් ප්‍රකාශ කිරීමට හැකි බවයි.
