විදේශ ගමන් බලපත්‍ර 66 ක් සන්තකයේ තබාගෙන සිටි සැකකාරියක් සහ සැකකරුවෙකු කහතුඩුව, සියඹලාගොඩ ප්‍රදේශයේදී අත්අඩංගුවට ගෙන තිබෙනවා.
කහතුඩුව පොලිස් ස්ථානයේ නිලධාරීන්ට ලද තොරතුරක් මත අදාළ නිවසේ ඊයේ (16) සවස සිදුකළ වැටලීමක දී මෙම සැකකරුවන් අත්අඩංගුවට ගෙන තිබෙනවා.
අත්අඩංගුවට ගත් සැකකාරිය වයස අවුරුදු 42 ක් වන අතර, සැකකරු වයස අවුරුදු 38 වන සියඹලාගොඩ ප්‍රදේශයේ පදිංචිකරුවන් වනවා.
සැකකාරිය සිංගප්පූරුව, හොංකොං, ඩුබායි සහ රුමේනියා යන රටවල සේවය කර 2022 වර්ෂයේ මෙරටට පැමිණ මෙම ප්‍රදේශයේ සැකකරු සමග පදිංචිව සිට ඇති බව සදහන් වනවා.
මොවුන් විසින් වසර දෙකහමාරක පමණ කාලයක සිට විවිධ පුද්ගලයින්ට විදේශ රැකියා ලබා දෙන බවට පවසා එම පුද්ගලයන්ගේ විදේශ ගමන් බලපත්‍ර රාජගිරිය ප්‍රදේශයේදී මාර්ගයන් වල රැඳී සිටිමින් ලබාගෙන ඇති බව අනාවරණය වී තිබෙනවා.
පසුව ඒජන්සි හරහා වීසා අයදුම් කර රැකියා සඳහා සම්මුඛ පරීක්ෂණයට කැඳවන බව පවසා එම පුද්ගලයන්ගෙන් රුපියල් ලක්ෂ 02 -03 අතර මුදලක්ද ලබා ගෙන එම විදේශ ගමන් බලපත්‍ර ද මොවුන් සන්තකයේ තබා ගෙන තිබෙනවා.
සැකකරුවන් පදිංචිව සිටි නිවස පරීක්ෂා කිරීමේදී, අයිස් මත්ද්‍රව්‍ය මිලිග්‍රෑම් 20 ක් ද තිබී සොයාගෙන තිබෙනවා.
සිද්ධිය සම්බන්ධයෙන් කහතුඩුව පොලීසිය වැඩිදුර පරීක්ෂණ සිදුකරනු ලබනවා.
