ජාතික ජන බලවේගයේ ජාතික ලැයිස්තු මන්ත්‍රීවරයෙකු ලෙස තේරී පත්වී ඇති, ශ්‍රී ලංකා දෘශ්‍යාබාධිත උපාධිධාරී මණ්ඩලයේ සභාපති, සුගත් වසන්ත ද සිල්වා මහතා වෙනුවෙන් විශේෂ වැඩපිළිවෙලක් සකස් කර තිබෙනවා.
පාර්ලිමේන්තු මහලේකම් කුෂානි රෝහණදීර මහත්මිය පවසන්නේ මන්ත්‍රීවරයාට ආසන පැනවීමේ සිට සභා ගර්භයට පිවිසෙන අවස්ථාවේ සිට ඡන්දය භාවිත කිරීම දක්වා සියලු කටයුතු සංවිධාන කර ඇති බවයි වාර්තා වෙන්නේ.
සුගත් වසන්තද සිල්වා මහතාට ආසන පැනවීමේදී ආණ්ඩු පක්ෂයේ මන්ත්‍රීවරුන් සිටින ස්ථානයේ සිට සභාගර්භයට පිවිසෙන ළඟම ආසනය වෙන් කිරීමටයි කටයුතු කර තිබෙනවා.
ඡන්දය භාවිත කරන අවස්ථාවේදී ස්ථාවර නියෝගවලට අනුව ඔහුට කටහඬ භාවිත කරමින් සිය කැමැත්ත පළ කිරීමට හැකියාව පවතිනවා.
එමෙන්ම, සියලු ලිපි ලේඛන බේල් ක්‍රමය යටතේ ලබාදීම සම්බන්ධයෙන් අවධානය යොමු කිරීමටද නියමිතව බව සඳහන්.
තවද, මන්ත්‍රීවරයාට පාර්ලිමේන්තු සංකීර්ණයේදී අවශ්‍ය කටයුතු කර දීම සඳහා ද නිලධාරියෙක් පත් කර තිබෙනවා.
එම නිලධාරියා එදින පුරාවට ඔහුගේ සියලු අවශ්‍යතා ඉටු කර ගැනීම සඳහා සහය වනු ඇති.
සභා ගර්භය තුළදී මතුවන අවශ්‍යතා ඉටු කරදීමට පාර්ලිමේන්තු සේවා සහයකන් සිටින බව ද මහලේකම්වරිය අවධාරණය කළා.
කාරක සභාවලට සහභාගී වන අවස්ථාවේදී ද ඊට අදාළ සියලු පහසුකම් ලබාදීමට සැලැසුම් කර ඇති බවද වාර්තා වෙනවා.
