පියකු සහ පාසල් දියණියක් ගමන් කළ යතුරු පැදියක් අනුරාධපුර වලිසිංහ හරිස්චන්ද්‍ර මාවතේදී, පාසල් බස් රථයක ගැටීම හේතුවෙන් සිදු වූ රිය අනතුරකින් බරපතල තුවාල ලැබූ, එම පියා ජීවිතක්ෂයට පත්වූ බව අනුරාධපුර මූලස්ථාන පොලිසිය පවසනවා.
මෙලෙස ජීවිතක්ෂයට පත්ව ඇත්තේ, අංක 21/117/බී, ඉසුරු පුර, අනුරාධපුර ලිපිනයේ පදිංචිව සිටි සම්පත් වඩුගේ නිරන්ජන් ඩේමියන් ද සිල්වා නැමති 56 හැවිරිදි සත්ව සංවර්ධන උපදේශකවරයෙක්.
මරණකරුගේ දියණිය (17 ) අනතුරින් තුවාල ලබා රෝහල්ගතව, නේවාසිකව ප්‍රතිකාර ලබන බව පොලිසිය සඳහන් කළා.
පොලීසිය පවසන්නේ, පාසල් බස් රථය අනුරාධපුර නගරයේ ඔරලෝසු කණුව වට රවුම දෙස සිට අනුරාධපුර රෝහල දෙසට ගමන් කරමින් තිබියදී, මරණකරු ගමන් කල යතුරු පැදිය එක්වරම අතුරු මාර්ගයක සිට ප්‍රධාන මාර්ගයට ඇතුල් කිරීමේදී අනතුර සිදුවූ බවයි.
අනතුර සම්බන්ධයෙන් සැකපිට බස් රථයේ රියදුරා වන අනුරාධපුර, තලාව, මල්වානේගම ප්‍රදේශයේ පදිංචි 54 හැවිරිදි පුද්ගලයෙකු අත්අඩංගුවට ගෙන තිබෙනවා.
