නීති විරෝධී කටයුත්තකට හෝ පුරාවිද්‍යා කැණීමකට සූදානම් වෙමින් සිටි බවට සැක කරන යුද හමුදා බ්‍රිගේඩියර්වරයෙක් ලෙස පෙනී සිටි පුද්ගලයෙක්, යුද හමුදාවේ සාමාජිකයින් දෙදෙනෙක්, ඇතුළු පුද්ගලයින් 11 දෙනෙක් නාමල්ගම ප්‍රදේශයේදී වැලිකන්ද පොලීසිය විසින් පසුගියදා (23) රාත්‍රියේදී අත්අඩංගුවට ගෙන තිබෙනවා.
වැලිකන්ද පොලීසිය පවසන්නේ ඔවුන් සතුව තිබී මෝටර් රථ තුනක් සහ කැබ් රථයක්ද පොලිස් භාරයට ගත් බවයි.
මෙම සැකකරුවන් අතර බදුල්ල ප්‍රදේශයේ පදිංචි පුද්ගලයෙකු සිට ඇති අතර ව්‍යාජ හැඳුනුම්පතක්, හමුදා නිල ඇඳුම් සහ බ්‍රිගේඩියර්වරයෙකුගේ ඇඳුමට සමාන ඇඳුම් ඔහු සන්තකයේ තිබියදී සොයා ගෙන තිබෙනවා.
එමෙන්ම, යුද හමුදාවේ සේවයෙ නියුතු ත්‍රිකුණාමලය හෙන්ද්‍රික් බලකොටුවේ ආරක්ෂාවේ නිරත වන හමුදා නිලධාරීන් දෙදෙනෙක්ද මෙම පිරිස අතර සිට ඇති බව පොලීසිය පවසනවා.
සෙසු සැකකරුවන් අට දෙනා යක්කල, පාදුක්ක, ගලේවෙල, මිල්ලවාන, තංගල්ල යන ප්‍රදේශවල පදිංචිකරුවන් පිරිසක්.
පොල්ගේන්ගොඩ යුද හමුදා කඳවුරේ විනයාරක්ෂක බලකා නිලධාරීන් පිරිසක් විසින් ලබාදුන් තොරතුරකට අනුව වැලිකන්ද පොලිසිය හා එම කඳවුරේ නිලධාරී කණ්ඩායමක් එක්ව මෙම සැකකරුවන් අත්අඩංගුවට ගෙන තිබුණා.
මෙම පිරිස අතර සිටි බ්‍රිගේඩියර්වරයෙකු ලෙස පෙනී සිටින පුද්ගලයා හමුදාවට සම්බන්ධ අයෙකු නොවන බව විමර්ශනවලදී වැඩිදුරටත් අනාවරණය වී තිබෙනවා.
