අසුරණයේ තිබූ නිෂ්පාදිත දිනය, මිල හා කල් ඉකුත් වීමේ දිනය වෙනස් කරමින් උත්සව සමයේදී වෙළඳපලට යොමු කිරීමට තිබූ කල් ඉකුත් වූ “අමුල්” වර්ගයේ ආනයනික සහල් කිලෝ 17,925ක් පාරිභෝගික කටයුතු පිළිබඳ අධිකාරියේ නිරීක්ෂණය මත විනාශ කරන ලෙස කොළඹ අතිරේක මහේස්ත්‍රාත් පවිත්‍රා සංජීවනී පතිරාජ මහත්මිය අද (27) නියෝග කළා.
සහල් තොගයේ කල්ඉකුත් වීමේ දිනය වසර දෙකක් ඉදිරියට දමා වෙනස් කළ කොළඹ 14, සහල් ආනයනික සමාගමකට හා හිමිකරුට එරෙහිව පාරිභෝගි කටයුතු අධිකාරිය පැවරූ පැමිණිල්ලක් සලකා බැලීමෙන් පසුවයි මෙම නියෝගය නිකුත් කළේ.
පසුව සහල් ආනයනය කළ ව්‍යාපාරිකයාට රුපියල් ලක්ෂයක දඩයක්ද නියම කළා.
විත්තිකරු අධිකරණය ඉදිරියේ වරද පිළිගැනීම හේතුවෙන් මෙම දඩය නියම කෙරුණා.
නිලධාරීන් පවසන්නේ, කොළඹ 14 විත්කරුගේ ගබඩාවේ තිබී කිලෝ 25ක් බරැති සහල් මිටි 717 ක් අත්අඩංගුවට ගෙන මුද්‍රා තැබූ බවයි.
ඉදිරිපත් වූ කරුණු සලකා බැලූ මහේත්‍රාත්වරිය පාරිභෝගික නිලධාරීන් ඉදිරියේදි සතියක් ඇතුළත සහල් තොගය විනාශ කරන ලෙසට නියෝග කළ අතර විත්තිකරුට රුපියල් ලක්ෂයක දඩයක්ද නියම කළා.
