නුවරඑළිය ප්‍රදේශයට තවදුරටත් අධික වැසි පතිත වීම හේතුවෙන් ඉහළ කොත්මලේ ජලාශයේ වාන් දොරටු දෙකක් අඛණ්ඩව විවෘත කර ඇති බව එම ජලාශය භාර ඉංජිනේරුවරයෙක් පවසනවා.
ඉහළ කොත්මලේ ජලාශයේ ජල මට්ටම ඉහළ මට්ටමට පැමිණෙන විට ජලාශයේ සෙසු වාන් දොරටු ස්වයංක්‍රියව විවෘත වන බැවින් ජලාශ වේල්ලට පහළින් කොත්මලේ ඔය දෙපස පදිංචිකරුවන්ට සැලකිලිමත්ව සිටින ලෙස නුවරඑළිය දිස්ත්‍රික් ආපදා කලමණාකරණ ඒකකය ඉල්ලා සිටිනවා.
එමෙන්ම, පවතින වර්ෂාවත් සමඟ හැටන් නුවරඑළිය සහ නුවරඑළිය ගම්පොල ප්‍රධාන මාර්ගයට ස්ථාන කිහිපයකින් පස් කඳු කඩා වැටී ඇති නිසා එම මාර්ගවල රථ වාහන ධාවනයේදී සැලකිලිමත් ආකාරයෙන් රිය ධාවනය කරවන ලෙස ආපදා කලමණාකරණ ඒකකය රියදුරන්ට දැනුම් දෙනවා.
මේ අතර, ඇද හැලෙන අධික වර්ෂාවත් සමග සෙන් ක්ලෙයාර් සහ ඩොවොන් දිය ඇළිවල ජල ධාරිතාවද ඉහළ ගොස් තිබෙනවා.
එමෙන්ම, පවතින අයහපත් කාලගුණයත් සමග කොළඹ කොටුව සිට බදුල්ල දක්වා ධාවනය වන මඟී ප්‍රවාහන දුම්රිය නානුඔය දුම්රිය ස්ථානය දක්වා සීමා කිරීමටද පියවර ගෙන තිබුණා.
නානුඔය දුම්රිය ස්ථානයේ නිලධාරියෙක් සඳහන් කළේ එම දුම්රිය ධාවනය කිරීමේදී වේග සීමාද පනවා ඇති බවයි.
