16 හැවිරිදි සිසුවියකගේ නිරුවත් ඡායාරූප සහ වීඩියෝ පට ගෙන්වා ගෙන අපයෝජනයට ලක් කළ බවට සැක කෙරෙන පාසල් ගුරුවරයෙක් සම්බන්ධයෙන් දිවුලපිටිය පොලිසිය මගින් විශේෂ විමර්ශනයක් ආරම්භ කර තිබෙනවා.
පොලීසිය පවසන්නේ මෙම ගුරුවරයා ඔහුගේ ජංගම දුරකථනය උපයෝගී කරගෙන පාසලේ තමන් විසින් අධ්‍යාපනය ලබා දෙන තරුණ දැරියන්ගේ නිරුවත් ඡායාරූප සහ වීඩියෝ පට ගෙන්වා ගෙන ඔවුන් අපයෝජනයට ලක් කර ඇති බවට චෝදනා එල්ල වී ඇති බවයි.
මෙම ගුරුවරයා මව් පිය සෙනෙහස අහිමිවන, වෙනත් ගැටළු සහිත බව පෙනෙන දැරියන් ඉලක්ක කරගමින් ඔවුන් සමඟ සමීප සම්බන්ධතා ගොඩනඟා ගෙන එම දැරියන් අපයෝජනයට ලක් කර ඇති බවද පොලීසිය තවදුරටත් සඳහන් කර තිබෙනවා.
මේ වන විට පරීක්ෂණයක් ආරම්භ කර ඇත්තේ මෙම ගුරුවරයා විසින් අපයෝජනයට ලක් කළ බව පැවසෙන සාමාන්‍ය පෙළ විභාගය සඳහා සූදානම් වන 16 හැවිරිදි වියේ පසුවන සිසුවියක් සම්බන්ධයෙන්.
අවස්ථා කිහිපයකදී ගුරුවරයා විසින් මෙම දැරියට මුදල් ලබා දී ඇති බවත් වට්ස් ඇප් පණිවිඩ මඟින් ඇයව පිටත ස්ථානයක් කරා රැගෙන යාමට දැරියට යෝජනා කර ඇති බවත් පොලීසිය විසින් අනාවරණය කරගෙන තිබෙනවා.
මේ අතර, මෙම සිදුවීම සම්බන්ධ පැමිණිල්ල විමර්ශනය කිරීමේදී මිනුවන්ගොඩ පොලිස් ස්ථානයේ ළමා හා කාන්තා කාර්යාංශයේ ස්ථානාධිපතිනිය විසින් වින්දිත දැරියට අපහාස වන ආකරයේ හැසිරීමක් පෙන්නුම් කර ඇති බවද වාර්තා වෙනවා.
කෙසේවෙතත්, ඊයේ (09) දිනයේද මෙම පාසලේ ගුරුවරයා උගන්වන පාසලේ විදුහල්පතිවරයාටද ප්‍රකාශයක් ලබා දීම සඳහා දිවුලපිටිය පොලීසියට පැමිණෙන ලෙස දැනුම් දී තිබෙනවා.
එමෙන්ම මෙම ගුරුවරයා සම්බන්ධයෙන් මිනුවන්ගොඩ පොලිස් ස්ථානය සහ දිවුලපිටි පොලිස් ස්ථානය මේ වන විට පරීක්ෂණ කටයුතු ආරම්භ කර තිබෙනවා.
