පොදු ව්‍යාපාර පිළිබඳ කාරක සභාවේ (කෝප්) සාධාරණ නියෝජනයක් ලබා දෙන තෙක් එහි නියෝජනය සඳහා විපක්ෂයෙන් මන්ත්‍රීවරුන්ගේ නම් ඉදිරිපත් නොකිරීමට තීරණයක් ගෙන ඇති බව වාර්තා වෙනවා.
ජන බලවේගයේ පාර්ලිමේන්තු මන්ත්‍රි නලින් බණ්ඩාර මහතා ‘මව්බිම’ වෙත අදහස් දක්වමින් මේ බව ප්‍රකාශ කර තිබෙනවා.
නලීන් බණ්ඩාර මන්ත්‍රීවරයා පවසා ඇත්තේ, සාමාජිකයන් 31 දෙනෙකුගෙන් සංයුක්ත වන පොදු ව්‍යාපාර කාරක සභාවේ විපක්ෂයට සාමාජිකයන් 12ක නියෝජනයක් ඉල්ලා සිටියත් එය හත් දෙනෙකුට සීමා කිරීම නිසා මෙසේ නම් නොයැවීමට තීරණය කළ බවයි.
පොදු ව්‍යාපාර පිළිබඳ කාරක සභා සභාපතිත්වය විපක්ෂයට ලබා දිය යුතු බවට විපක්ෂයේ සිටියදී බලකළ ජනතා විමුක්ති පෙරමුණ මෙම නව පිළිවෙත මගින් පාර්ලිමේන්තු ප්‍රජාතන්ත්‍රවාදය අභියෝගයට ලක් කර ඇති බවටද නලින් බණ්ඩාර මන්ත්‍රීවරයා චෝදනා කර තිබෙනවා.
පාර්ලිමේන්තුවේ පොදු ව්‍යාපාර පිළිබඳ කාරක සභාවේ (කෝප්) සභාපතිවරයා ලෙස ජාතික ජන බලවේගයේ පාර්ලිමේන්තු මන්ත්‍රි නිශාන්ත සමරවීර මහතා පසුගියදා (09) පත්කරනු ලැබුවා.
කෝප් කමිටුවේ එම මංගල හමුවට සහභාගී වී ඇත්තේ ජාතික ජන බලවේගයේ මන්ත්‍රිවරු පමණක් බවයි වාර්තා වෙන්නේ.
