තමාව අත්අඩංගුවට ගැනීමේ සූදානමක් පවතින බැවින් තමන්ට අපේක්ෂිත ඇපයක් ලබාදෙන ලෙස ඉල්ලා හිටපු කම්කරු හා විදේශ රැකියා අමාත්‍ය මනුෂ නානායක්කාර ඉදිරිපත් කර ඇති ඇප අයදුම්පතක් සම්බන්ධයෙන් කරුණු දැක්වීම සඳහා මෙම මස 20 දින අධිකරණයේ හමුවේ පෙනී සිටින ලෙස දන්වා අපරාධ පරීක්ෂණ දෙපාර්තමේන්තුවේ ස්ථානාධිපතිවරයාට හා සමුද්‍රීය අපරාධ විමර්ශන කොට්ඨාසේ ස්ථානාධිපතිවරයාට නොතීසී නිකුත් කරන ලෙසට කොළඹ ප්‍රධාන මහේස්ත්‍රාත් තනුජා ලක්මාලි නියෝග කර තිබෙනවා.
හිටපු අමාත්‍යවරයා ජනාධිපති නීතිඥ සාලිය පීරිස් ඇතුළු නීතිඥ කණ්ඩායමක් මගින් ගොනු කළ ඇප අයදුම්පතක් සලකා බලමින් අධිකරණයෙන් එසේ නියම කර ඇති බවයි වාර්තා වන්නේ.
ශ්‍රී ලංකාව හා දකුණු කොරියාව අතර කෘෂිකාර්මික හා ධීවර සේවක වැඩසටහනකට අදාලව පෙත්සම්කරු අත්සන් කර ඇති අවබෝධතා ගිවිසුමක් හා ඊ 8 වීසා ගැටලුවක් සම්බන්ධයෙන් අපරාධ පරීක්ෂණ දෙපාර්තමේන්තුව තම සේවාදායකයා අත්අඩංගුවට ගැනීමේ සූදානමක් පවතින බවද නීතිඥවරු එම ඇප අයදුම්පත යොමු කරමින් අධිකරණය හමුවේ පවසා තිබෙනවා.
පෙත්සම්කරුට හිමිව තිබූ බලතල අනුව නිල කටයුත්තක් ලෙස ඊට අත්සන් තබා ඇති නමුත් එය ඔහු පෞද්ගලිකව සිදුකළ ක්‍රියාවක් නොවන බවද මෙහිදී නීතිඥවරු අධිකරණයට දන්වා ඇති බවයි වාර්තා වන්නේ.
ඔහු සිදු කර ඇත්තේ ඇමතිවරයා වශයෙන් රජයන් දෙකක් අතර අවබෝධතා ගිවිසුමක් අත්සන් කිරීම පමණක් වන බවත්, ඔහුට එරෙහිව අපරාධ නඩුවක් පවත්වාගෙන යාමට හැකියාවක් නොමැති බවත්, ඒ හේතුවෙන් පෙත්සන්කරුට අපේක්ෂිත ඇපයක් නියම කරන ලෙසයි නීතිඥවරු අධිකරණයෙන් ඉල්ලා ඇත්තේ.
එම කරුණු සලකා බැලු මහේස්ත්‍රාත්වරිය ඒ පිළිබඳව සලකා බැලීම කල් දමා තිබෙනවා.
