පවතින මහ වැසිත් සමග විල්පත්තුව ජාතික වන උද්‍යානය මැදින් වු මාර්ගය ක්‍රොස්වේ සපත්තු පාලම අසලින් සම්පුර්ණයෙන් ජලයෙන් යටවිමත් සමග මාර්ගය අද (19) සිට වසා දමා ඇති බව පුත්තලම ආපදා කළමණාකරණ ඒකකය පවසනවා.
ඉහල ජලධාරා ප්‍රදේශවලට ඇද හැලෙන මහ වැසි හා රාජාංගන ජලාශයෙ වාන් දොරටු විවෘත කිරීමත් සමග එයින් එන දැවැන්ත ජල කද කළාඔය හරහා පැමින වනාතවිල්ලුව ගගේවාඩිය ආසන්නයෙදී මුහුදට වැටිම සිදුවෙනවා.
මේ හේතුවෙන් පුත්තලම සිට වනාතවිල්ලුව හරහා ක්‍රොස්වේ තැලවිලි පාලම මතින් විල්පත්තුව ජාතික වන උද්‍යානය හරහා ගමන් කිරීම සිදුවනවා.
එහෙත් ගලා බසිනා දැවැන්ත ජල කද අද වන විට එළුවන්කුලම ක්‍රොස්වේ සපත්තු පාලම අසලින් සම්පුර්ණයෙන් ජලයෙන් යටවි වනජීවි කාර්යාල භුමිය හා ඒ අසල පිහිටි නාවික හමුදා කදවුරද මේ වන විට ජලයෙන් යටව ඇති බව ආපදා කළමණාකරණ ඒකකය පවසනවා.
මේ හේතුවෙන්, මෙම මාර්ගය භාවිතා කරමින් විල්පත්තුව ජාතික වන උද්‍යානයට ගමන් කල සංචාරකයින්, වනජීවි නිළධාරින් හා ආරක්ෂක අංශ සාමාජීකයින්ට එය තාවකාලිකව ජලය ක්‍රමයෙන් බැස යන තුරු ගමනාගමන කටයුතු නවතා ඇති බව වාර්තා වනවා.
ඒ සමගම කළාඔය පිටාර ගැලිම නිසා එළුවන්කුලිම මාර්ගයෙද ජලය ක්‍රමයෙන් වැඩිවිමක් සිදුව ඇති බවද වාර්තා වනවා.
