ලෝක උරුම නකල්ස් කලාපයේ රිවෙස්ටන් සහ පිටවල පතන නැරඹීම සදහා දේශිය සහ විදේශීය සංචාරකයින් විශාල පිරිසක් සති අන්ත දිනවල පැමිණීම නිසා ඉතා අධික වාහන තදබදයක් පවතින බැවින් සංචාරකයින් රැගෙන ආසන 54 සහ ආසන 57 බස් රථවලින් පැමිනිමෙන් වලකින ලෙස සංචාරකයින්ට දැනුම් දීමට තීරණය කර තිබෙනවා.
මෙම තීරණය ගෙන ඇත්තේ මාතලේ දිස්ත්‍රික් සම්බන්ධීකරණ කමිටු සභාපති,බුද්ධ ශාසන ,ආගමික කටයුතු සහ සංස්කෘතික නියෝජ්‍ය අමාත්‍ය ගමගෙදර දිසානායක මහතා සහ මාතලේ දිස්ත්‍රික් ලේකම් තේජානි තිලකරත්න මහත්මියගේ ප්‍රධානත්වයෙන් පැවති සාකච්ඡාවකදීයි.
රිවස්ටන් මාර්ගයේ වාහන දෙකකට මාරුවිය නොහැකි පටු වංගු 07 ක් තිබෙන බවත් එවැනි වංගුවලදී විශාල ප්‍රමාණයේ බස් රථවලට මාරු වීමට නොහැකි බැවින් මෙම තදබදය උග්‍ර වී තිබෙන බවයි පැවසෙන්නේ.
මෙම තත්ත්වය පාලනය කිරීම සදහා තාවකාලික පියවරක් ලෙස සති අන්ත දිනවල ආසන 54/57 බස් රථ පැමිණීම හැකිතාක් දුරට වැලැක්වීමට තිරණය කර තිබෙනවා.
මෙසේ පැමිණෙන බස් රථ සහ වෙනත් වාහන ඇතැම් අවස්ථාවල පිටවල පතන ප්‍රදේශයේ ගාල් කොට තිබෙනු දැකිය හැකි බවත් එය මෙම ප්‍රදේශයේ ජෛව විවිධත්වයටද අහිතකර ලෙස බලපා තිබෙන බවටත් මෙහිදී හෙළිව තිබෙනවා.
විශේෂයෙන්ම පිටවල පතනට ආවේනික ගල්පර මැඩියා ,සහ මාංශ භක්ෂක ශාඛ විශේෂ රැසකට ද මේ තත්ත්වය තර්ජනයක් වී තිබෙන බවයි සඳහන් වන්නේ.
එබැවින් පෙබරවාරි මාසයේ සිට සති අන්ත දිනවල ආසන 54,57 බස් රථ මෙම ප්‍රදේශයට රැගෙන ඒමෙන් වලකින ලෙස සංචාරකයින්ගෙන් ඉල්ලා සිටීමට අදාල කිමිටුව තීරණය කර තිබෙනවා.
