ඇස්ට්‍රොසෙනිකා තෙවැනි මාත්‍රාවෙන් ප්‍රතිශක්තිකරණය ඉහළට – නවතම අධ්‍යයනයකින් හෙළිවෙයි

ඇස්ට්‍රොසෙනිකා කොවිඩ් 19 එන්නතේ තුන්වන මාත්‍රාව ලබා ගැනීමෙන් ප්‍රතිශක්තිකරණය වඩාත් ඉහළ යන බව නවතම අධ්‍යයනයකින් හෙළිව තිබේ.

කෙසේවෙතත් තෙවැනි මාත්‍රාව ලබාගැනීම අනිවාර්ය බව මෙතෙක් තහවුරු වී නොමැත.

මෙම අනාවරණය සිදුවන්නේ කොවිඩ්19 එන්නතක පළමු මාත්‍රාව හෝ ලබා නොදුන් රටවල් ගණනාවක් ඇති පසුබිමකයි.

ඔක්ස්ෆර්ඩ් විශ්ව විද්‍යාලය සිදුකල මෙම අධ්‍යයනය මගින් වැඩිදුරටත් අනාවරණය කරගෙන ඇත්තේ ඇස්ට්‍රොසෙනිකා දෙවැනි මාත්‍රාව සති 45ක් දක්වා ප්‍රමාද කළහැකි අතර එය ප්‍රතිශක්තිකරණය ඉහළ නංවන බවයි.

ඔක්ස්ෆර්ඩ් එන්නත් සමුහයේ අධ්‍යක්ෂ ඇන්ඩෘ පොලාර්ඩ් පෙන්වා දෙන්නේ දැනට පවතින වෛරස ප්‍රභේද සඳහා සැලකිය යුතු කාලයක් ප්‍රතිශක්තිය ලබා දෙන බැවින් තුන්වන මාත්‍රාවක අවශ්‍යතාව පැන නොනගිනු ඇති බවයි.

“එය අත්‍යාවශ්‍ය වුවහොත් ඒ සඳහා අප සූදානම්ව සිටිය යුතුයි. නමුත් එය අවශ්‍ය බවට අපිට කිසිදු සාක්ෂියක් නැහැ ” අධ්‍යක්වරයා වැඩිදුරටත් සඳහන් කළේය.

ඇස්ට්‍රොසෙනිකා දෙවන මාත්‍රාව සති හතරකින් නොව සති දොළහකින් ලබා දීමෙන් වැඩි ඵලදායිතාවක් පෙන්නුම් කරන බව මීට පෙර සිදුකළ අධ්‍යයනයකින් හෙළිව තිබුණි.

⁣ඊයේ (28) අනාවරණ කෙරුණු පර්යේෂණය සඳහා දෙවන මාත්‍රාව ප්‍රමාද වූ 30 දෙනෙක් සහ තුන්වන මාත්‍රාව ලබාගත් 90 දෙනෙක්ද සහභාගී කරගෙන ඇති අතර ඔවුන් සියලු දෙනාම වයස අවුරුදු 55ට අඩු අය වුහ.