දේශීය ආදායම් (සංශෝධන) පනත් කෙටුම්පත සංශෝධන රහිතව අද (20) පාර්ලිමේන්තුවේ දී සම්මත වූ බව පාර්ලිමේන්තු සන්නිවේදනය දෙපාර්තමේන්තුව නිවේදනය කරනවා.
මෙම පනත් කෙටුම්පතට අදාළ දෙවනවර කියවීමේ විවාදය ප.ව. 5.40 සිට ප.ව. 7.10 දක්වා පැවැත්වුණා.
ඉන් අනතුරුව කාරක සභා අවස්ථාවේදී පනත් කෙටුම්පත සලකා බැලීමෙන් පසුව සංශෝධන රහිතව පාර්ලිමේන්තුවේ දී සම්මත වුවා.
දේශීය ආදායම් (සංශෝධන) පනත් කෙටුම්පත පළමුවර කියවීම සඳහා ඉකුත් මාර්තු 1වනදා පාර්ලිමේන්තුවට ඉදිරිපත් කරන ලදී.
මෙම දේශීය ආදායම් (සංශෝධන) පනත් කෙටුම්පත සඳහා ආණ්ඩුක්‍රම ව්‍යවස්ථාවේ 79 වැනි ව්‍යවස්ථාව ප්‍රකාරව කථානායක වෛද්‍ය ජගත් වික්‍රමරත්න මහතා අද (20) සිය සහතිකය සටහන් කළා.
ඒ අනුව මෙම පනත් කෙටුම්පත 2025 අංක 2 දරණ දේශීය ආදායම් (සංශෝධන) පනත ලෙස බලාත්මක බව පාර්ලිමේන්තු සන්නිවේදනය දෙපාර්තමේන්තුව සිය නිවේදනයෙන් වැඩිදුරටත් දන්වා සිටිනවා.
