ත්‍රස්තවාදය වැළැක්වීමේ පනතේ විධිවිධාන යටතේ ජනාධිපති ගෝඨාභය රාජපක්ෂ මහතා විසින් නිකුත් කරන ලද දැඩි අන්තවාදි මතවාදවලින් මුදා ගැනීමේ රෙගුලාසි ක්‍රියාත්මක කිරීම වළක්වාලමින් ශ්‍රේෂ්ඨාධිකරණය ඊයේ (05) අතුරු නියෝගයක් නිකුත් කළා.
ඒ එම රේගුලාසි ක්‍රියාත්මකවීම වළක්වාලමින් අතුරු තහනම් නියෝගයක් නිකුත් කරන ලෙස මාධ්‍යවේදින්, මානවහිමිකම් ක්‍රියාකාරින් සහ විකල්ප ප්‍රතිපත්ති කේන්ද්‍රය ගොනුකර තිබු මූලික අයිතිවාසිකම් පෙත්තම් 03ක් සලකා බැලීමෙන් අනතුරුවයි.
මුර්දු ප්‍රනාන්දු , යසන්ත කෝදාගොඩ සහ අචල වෙංගප්පුලි යන මහත්ම මහත්මීන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් හමුවේ මෙම පෙත්සම් සලකා බැලීම සිදුවු අතර එම සලකා බැලීම අවසානයේ මීළග නඩුදිනය වන ලබන 24 වැනිදා තෙක් බලපැවැත්වෙන පරිදි අතුරු නියෝගය නිකුත් කරනු ලැබුවා.
මාධ්‍යවේදීන් හා මානව හිමිකම් ක්‍රියාකාරිකයන් වන රුවන් ලක්නාත් ජයකොඩි , කවින්ද්‍යා ක්‍රිස්ටෝපර් තෝමස්, විකල්ප ප්‍රතිපත්ති කේන්ද්‍රයේ විධායක අධ්‍යක්ෂ ආචාර්ය පාක්‍යසෝති සරවනමුත්තු හා ශිරාන් සනුර නමැත්තන් ගොනු කොට ඇති මෙම පෙත්සම්වල වගඋත්තරකරු ලෙස නීතිපතිවරයා නම් කර තිබෙනවා.
පෙත්සම්කරුවන් සිය පෙත්සම් තුළ පෙන්වා දී ඇත්තේ 1979 අංක 48 දරණ ත්‍රස්තවාදය වැළැක්වීමේ තාවකාලික විධිවිධාන පනත යටතේ ජනාධිපති ගෝඨාභය රාජපක්ෂ මහතා විසින් පසුගිය මාර්තු 12 වැනි දින නිකුත් කරන ලද අංක 2218/68 /2021 දරණ අතිවිශේෂ ගැසට් නිවේදනය මගින් එම පනතේ 27 වැනි ඡේදය යටතේ අංක 01 නමින් “ දැඩි අන්තවාදි මතවාදයන්ගෙන් මුදාගැනීම් නමින් රෙගුලාසියක් ප්‍රකාශයට පත් කර ඇති බවයි.
එම රෙගුලාසිය බලාත්මක වුවහොත් ඒ යටතේ ඕනෑම පුද්ගලයකු අධිකරණ ක්‍රියාවලියකින් තොරව අත්අඩංගුවට ගෙන, පුනරුත්ථාපනයට යොමු කළ හැකි බව පෙත්සම්කරුවන් සිය පෙත්සම් තුළ පෙන්වා දී තිබෙනවා.
ඔවුන් වැඩිදුරටත් පෙන්වාදෙන්නේ ජනාධිපතිවරයා විසින් නිකුත් කරන ලද දැඩි අන්තවාදි මතවාදවලින් මුදා ගැනීමේ රෙගුලාසි ක්‍රියාත්මක කිරීම තුළ පුද්ගලික නිදහසට දැඩි තර්ජනයකට ලක්වන බව එල්ල වන බවයි.
එලෙස ගත්කළ මෙම රෙගුලාසි හේතුවෙන් ආණ්ඩුක්‍රම ව්‍යවස්ථාවේ 10 ,11 , 12.1 ,12.2 , 13.1 ,13.2 , 13.4 , 13 .5 ,13.6 ,13.1 (ආ) , 14.1 (ඈ) සහ 17 යන ව්‍යවස්ථා සහ වගන්තී සෘජුවම උල්ලංඝනය වන බැවින්, මෙම පෙත්සම් විභාගයට ගැනීමට අවසර ලබා දෙන ලෙසත් , තමන්ගේත් රටේ ජනතාවගේත් මූලික අයිතිවාසිකම් කඩ වන බවට ප්‍රකාශ කරන ලෙසත්, මෙම රෙගුලාසිය ක්‍රියාත්මක කිරීම වළකාලන අතුරු නියෝගයක් නිකුත් ලෙසත් පෙත්සම්කරුවෝ සිය පෙත්සම් තුළ ඉල්ලා තිබෙනවා.
