කාල්ටන් ස්පෝර්ට්ස් නෙට්වර්ක් හෙවත් CSN නාලිකාවට අයත් පිදුරුතලාගල UHF 47 (679.25 MHz) සංඛ්‍යාතය ඔස්සේ ගීත පමණක් විකාශය වන පර්යේෂණ විකාශයක් ආරම්භ කර තිබෙනවා.
CSN රූපවාහිනී නාලිකාව සදහා ලබා දී තිබූ විකාශන බලපත්‍රය 2016 වසරේ දී එවකට පැවති රජයේ ජනමාධ්‍ය අමාත්‍යාංශ ලේකම් නිමල් බෝපගේ මහතා විසින් අහෝසි කිරීමට කටයුතු කර තිබුණා.
ඒ විකාශන බලපත්‍රයේ සඳහන් වන වගන්ති උල්ලංඝනය කිරීමේ චෝදනා මතයි.
පසුව CSN නාලිකාව නීති විරෝධීව ආයෝජනය කළ බව කියන රු. මිලියන 157.5ක මුදලක් රාජසන්තක කිරීමට පොලිස් මූල්‍ය අපරාධ කොට්ඨාසය අධිකරණයෙන් කළ ඉල්ලීමකට අනුව කඩුවෙල මහේස්ත්‍රාත් අධිකරණය 2016 අගෝස්තු 10 වනදා අවසර ලබාදුන්නා.
නීති විරෝධී ලෙස ලැබුණු රුපියල් කෝටි 36.5 ක් කාල්ටන් ස්පෝර්ට්ස් නෙට්වර්ක් ආයතනය පිහිටුවීම සඳහා යොදා ගත් බවට වන චෝදනාව මත CSN නාලිකාවේ අධ්‍යක්ෂවරුන් වන නිශාන්ත රණතුංග, රොහාන් වැලිවිට, අෂාන් රවිනාත් ප්‍ර‍නාන්දු හා කවීෂාන් දිසානායක යන අය රක්ෂිත බන්ධනාගාර ගතවද සිටියා.
උපයාගත් ආකාරය හෙළි කළ නොහැකි මුදල් යොදවා CSN නාලිකාව ආරම්භ කිරීම ඇතුළු චෝදනා යටතේ කඩුවෙල මහේස්ත්‍රාත් අධිකරණය හමුවේ විභාග වන නඩුවකට අදාලව යෝෂිත රාජපක්ෂ මහතාද රක්ෂිත බන්ධනාගාර ගත කෙරුණා.
කෙසේ වෙතත් 2020 මැයි 26 වනදා CSN නාලිකාව විසින් ගොනු කල රිට් පෙත්සම අභියාචනාධිකරණයේදී සමථයකට පත්වුණා.
ඒ අනුව 2016.10.23 දින වන විට එම නාලිකාව ලබා දී තිබූ සංඛ්‍යාත ඒ අයුරින්ම නැවත ලබා දීමට කඩිනමින් පියවර ගැනීමට විදුලි සංදේශ නියාමන කොමිසම ද අධිකරණයේදී එකඟතාවය පල කළා.
