ට්විටර් රාහුල් ගාන්ධි ඇතුළු කොංග්‍රසයේ ඉහළ පෙළේ නායකයින්ගේ ගිණුම් අවලංගු කරයි
මිලියන 20කට ආසන්න අනුගාමිකයන් ප්‍රමාණයක් සිටින කොංග්‍රස් නායක රාහුල් ගාන්ධිගේ ට්විටර් ගිණුම එම සමාගම මඟින් අවහිර කර තිබෙනවා.තමන් ඇතුළු ඉහළ පෙළේ නායකයින්ගේ ගිණුම් අත් හිටුවීම ඉන්දියානු ප්‍රජාතන්ත්‍රවාදයට එල්ල කළ පහරක් යැයි රාහුල් ගාන්ධි විසින් චෝදනා කරනු ලැබුවා.
ඔහුගේ ට්විටර් ගිණුම අගුළු දැමීමට සමාගම පියවර ගත්තේ දිල්ලි අගනුවර දී දූෂණය කර මරා දැමූ දරුවාගේ දෙමව්පියන්ගේ ඡායාරූපයක් ට්වීට් කිරීමෙන් පසුවයි.
පාලක පක්ෂයේ නියෝග මත ට්විටර් ක්‍රියා කරන බවට කොංග්‍රස් පක්ෂය චෝදනා කර සිටිනවා.
නමුත් ට්විටර් පවසන්නේ ඡායාරූපය “සාධාරණව හා අපක්ෂපාතීව බලාත්මක කරන ලද” ඔවුන්ගේ පෞද්ගලිකත්ව නීති උල්ලංඝනය කර ඇති බවයි.
ට්විටර් තම ගිණුම වසා දමමින් ඉන්දියාවේ දේශපාලන ක්‍රියාවලියට බාධා කරන බව රාහුල් විසින් චෝදනා කරනු ලැබුවා.
“මෙය, රාහුල් ගාන්ධි වසා දැමීම පමණක් නොවේ. මට අනුගාමිකයන් මිලියන 19-20 ක් සිටිනවා. ඔබ ඔවුන්ට මතයක් දැරීමේ අයිතිය ප්‍රතික්ෂේප කරනවා. ඔබ කරන්නේ එයයි”
දිල්ලි අගනුවරදී හින්දු පූජකයෙකු සහ ඔහුගේ සගයන් විසින් දූෂණය කර මරා දැමූ බව කියන නව හැවිරිදි දලිත් දැරියගේ දෙමව්පියන් සමඟ ගාන්ධිගේ ඡායාරූපය අගෝස්තු 4 වන දින ඔහු පවුලට ගිය අවස්ථාවේදී ලබා ගන්නා ලද එකක් බවයි පැවසෙන්නේ.
