ලබන බදාදා සිට සතොස සහ සමූපකාර අලෙවිසැල් ජාලය හරහා දුඹුරු සීනි කිලෝවක් රුපියල් 130ක උපරිම සිල්ලර මිලක් යටතේ පාරිභෝගිකයින්ට ලබාගැනීමට හැකි බව රජය පවසනවා.
අද (30) දින සිට ලංකා සීනි සමාගම හරහා සියලුම සතොස, සමුපකාර ඇතුළු රජයේ අලෙවි ආයතන වෙත සීනි බෙදාහැරීම ආරම්භ කරන බව‍යි අපනයන කෘෂිකර්ම රාජ්‍ය අමාත්‍ය ජානක වක්කුඹුර පවසා සිටින්නේ.
වැඩි මිලට සීනි මිලදී ගැනීමෙන් වැලකී සිටින ලෙස ජනතාවගෙන් ඉල්ලා සිටින බවත් ඔහු පවසා සිටිනවා.
මේ අතර, ඊයේ පැවති මාධ්‍ය හමුවකට එක්වෙමින් පාරිභෝගික ආරක්ෂණ රාජ්‍ය අමාත්‍ය ලසන්න අලගියවන්න මහතා පවසා සිටියේ මෙරට මාසික සීනි පරිභෝජනය මෙට්‍රික්ටොන් 45,000ක් බවත් ඉන් මෙට්‍රික්ටොන් 23,000ක් ජනතාවගේ පරිභෝජනය බවත් ඉතිරිය වෙනත් අවශ්‍යතා සඳහා භාවිතා කරන බවත් මෙරට ජනතාවගේ දෛනික සීනි පරිභෝජනය මෙට්‍රික්ටොන් 1,500ක් බවත් එය සපුරාලීම සඳහා රජය උත්සහ කරන බවත් ය.
