මෙරට තුල කොවිඩ් වසංගතයේ ව්‍යාප්තිය ප්‍රබලව සිදුවන හෙයින් මුඛාවරණ දෙකක් පැළඳීම අනුමත කරන බවත් නිවෙසින් එළියට යන අවස්ථාවේදී මුහුණ වැසෙන “ෆේස් ෂීල්ඩ් ” ආවරණයක් පැළඳීමද ඉතා වැදගත් බවත් ප්‍රාථමික සෞඛ්‍ය සේවා, වසංගත රෝග හා කොවිඩ් රෝග පාලන කටයුතු රාජ්‍ය අමාත්‍ය, විශේෂඥ වෛද්‍ය සුදර්ශනී ප්‍රනාන්දුපුල්ලේ මහත්මිය පවසනවා.
එමෙන්ම, ලැබෙන එන්නත හොඳම එන්නත බවත්, ළඟම ඇති එන්නත්කරණ මධ්‍යස්ථානය වෙත ගොස් වර්ගය නොබලා කුමන හෝ කොවිඩ් මර්දන එන්නතක් කඩිනමින් ලබාගෙන ප්‍රවේශම් වන ලෙසත් ජනතාවගෙන් තමා ඉල්ලීමක් කරන බවත් ඇය පවසනවා.
මේ අතර, ගතවූ පැය 24 තුලත් කොරෝනා ආසාදිතයින් 3,619 ක් හදුනාගෙන ඇතැයි යුද හමුදාපති, ජෙනරාල් ශවේන්ද්‍ර සිල්වා මහතා පවසනවා. එමෙන්ම, තවත් කොරෝනා මරණ 204ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර ඇති බවයි ඔහු පවසන්නේ. මෙම මරණ 204 ඉකුත් බදාදා සිදුවූ කොරෝනා මරණ බවයි දක්වා ඇත්තේ.
තවද, වයස අවුරුදු 18 ට වැඩි 30ට අඩු පිරිස් සඳහා වන එන්නත්කරණ වැඩසටහන දිස්ත්‍රික්ක මට්ටමින් ආරම්භ කිරීමට පියවර ගත් බව සෞඛ්‍ය අමාත්‍ය කෙහෙලිය රඹුක්වැල්ල මහතා පවසනවා. ඒ අනුව, එළඹෙන සති දෙක තුන අවසන් වීමට පෙර වයස අවුරුදු 30 ඉක්මවූ සියලු පිරිස් පූර්ණ එන්නත්කරණයට ලක් කිරීමට හැකිවනු ඇති බවටත් ඔක්තෝබර් අවසානයට පෙර අවුරුදු 18 ඉක්මවූ පුරවැසියන් සඳහා වන එන්නත්කරණය අවසන් කිරීමට හැකි වනු ඇති බවටත් අමාත්‍යවරයා විශ්වාසය පල කර සිටිනවා.
