ඇෆ්ගනිස්තානයේ තලේබාන් පාලනය විසින් එරට ප්‍රධානතම රාජ්‍ය විශ්ව විද්‍යාලය වන කාබුල් විශ්ව විද්‍යාලය වසා දමා එය කාන්තාවන්ට තහනම් කලාපයක් බවට පත්කර ඇතැයි වාර්තා වේ.
පසුගිය බදාද පස්වරුවේ හදිසියේම විශ්ව විද්‍යාලය වසා දැමූ තලේබාන් බලධාරීන් එහි සිටි පිරිමි සහ කාන්තා සියලුම සිසුන් ආපසු යවා ඇති අතර පිරිමි කාර්ය මණ්ඩල සාමාජිකයන් සුලු පිරිසකට පමණක් එහි රැදී සිටීමට අවසර දී තිබේ.
විදෙස් මාධ්‍ය වාර්තා කළේ සියලුම කාන්තා ආචාර්යවරියන්, කාර්ය මණ්ඩල සාමාජිකාවන් සහ ශිෂ්‍යාවන් වෙත කාබුල් විශ්ව විද්‍යාල භූමිය තහනම් කලාපයක් බවට පත්කිරීමට තලේබාන් පාලනය හදිසියේම තීරණය කළ බවයි.
ශිෂයාවන්ට සාමකාමී වාතාවරණයක් යටතේ ඉගෙනීමට හැකිවන පරිදි පුලුල් සහ විධිමත් වැඩපිළිවෙලක් සකස් කරමින් ඇති බවත් එය අවසන් වූ පසු ඔවුන්ට යළි අධ්‍යාපන කටයුතු ඇරඹිය හැකි බවත් තලේබාන් රජයේ ජ්‍යෙෂ්ඨ ප්‍රකාශක බිලාල් කරීමි සදහන් කර තිබේ.
තලේබාන් සංවිධානය ඇෆ්ගනිස්තානයේ බලය අල්ලා ගැනීමෙන් පසු ඇතැම් පෞද්ගලික විශ්ව විද්‍යාල එකම දේශන ශාලා තුළ කොටස් වෙන් කර කාන්තාවන් සහ පිරිමින් වෙත වෙන් වෙන්ව අධ්‍යාපනය ලබාදීමට පියවර ගෙන තිබිණ.
කෙසේවෙතත්, තලේබාන් පාලනයේ උසස් අධ්‍යාපන අමාත්‍යවරයා දිගින් දිගටම අවධාරණය කරන්නේ කාන්තා සහ පිරිමි සිසුන්ට එකට අධ්‍යාපනය ලැබීමට ඉඩදිය නොහැකි බවයි.
